Qostanaıda balkon órtenip, turǵyn úıdegi 32 adam evakýatsııalandy
QOSTANAI. QazAqparat – Qostanaı qalasynda Abaı kóshesindegi kóp qabatty úılerdiń birinde balkon órtenip, páterlerdiń turǵyndary evakýatsııalandy, dep habarlaıdy QazAqparat.
Oblystyq TJD baspasóz qyzmeti taratqan málimetke sáıkes, órt búgin saǵat 08:15 shamasynda shyqqan.
«Páterlerdiń birindegi balkonnan órt shyqty. 32 turǵyn qaýipsiz jerge kóshirildi. Olardyń arasynda bala bolmady. Qutqarý jumystaryna jeke quramnyń 31 qyzmetkeri men 8 arnaıy tehnıkasy jumyldyryldy. Zardap shekkender joq», - dedi vedomstvonyń baspasóz hatshysy Ýálıhan Dosanov.
Jalyn 10 sharshy metr aýmaqty sharpyǵan. Saǵat 09:13-te órt tolyǵymen sóndirildi. Qazir mamandar onyń neden shyqqanyn anyqtap jatyr.
