Qostanaıda balanyń ıogýrttan ýlanyp qaza tabý faktisi boıynsha qylmystyq is qozǵaldy

QOSTANAI. QazAqparat - Qostanaı oblystyq prokýratýrasy belgisiz ıogýrttan ýlanyp, qaza tapqan balaǵa qatysty qylmystyq is qozǵalǵanyn málimdedi, dep habarlaıdy «QazAqparat» HAA tilshisi.

«Rasynda, buqaralyq aqparat quraldarynda jarııalanǵan aqparattarǵa baılanysty, 2017 jyldyń 23 aqpanynda 2014 jyly dúnıege kelgen balanyń ıogýrttan ýlanyp, qaza tabýyna qatysty sotqa deıingi tergeý jumystary bastaldy. Ýlanýdyń mán-jaıy anyqtalýda. Qylmystyq istiń tergeý jumystaryn oblystyq prokýratýra óz baqylaýyna aldy», - dep habarlady Qostanaı oblystyq prokýrorynyń orynbasary Ádilhan Erekeshev.

Bul qaıǵyly jaǵdaı tek Qostanaıdy ǵana emes, sondaı-aq elimizdiń barlyq óńirin dúrliktirdi. Buryn habarlanǵandaı, Qostanaıdaǵy sýpermarketterdiń birinde satyp alynǵan sút óniminen ýlanǵan 2 jasar qyzdy dárigerler bir apta boıy emdeýge tyrysqan. Keıin búldirshindi Astanaǵa ushaqpen jibergen, alaıda ony qutqarý múmkin bolmady.

Qostanaı oblystyq tutynýshylar quqyǵyn qorǵaý departamenti atap ótkendeı, qaza tapqan qyzdyń ata-anasynan satyp alynǵan ónimniń sapasyna baılanysty shaǵym kelip túspegen. Sondyqtan, satyp alynǵan dúkende tekseris júrgizýge ázirge negiz bolmaı otyr.