Qostanaıda balanyń buǵanasyn syndyrǵan tárbıeshi sottaldy
№2 Qostanaı qalalyq sotynda №61 balabaqsha tárbıeshisi Aısulý Deripsálige qatysty qylmystyq is qaraldy. Ol balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaǵany úshin (QK 141-baby 1-bóligi) sot aldynda jaýap berdi.
«2022 jyldyń 28 maýsymynda D. «Kóbelek» tobynyń oıyn zalynda tárbıe sabaǵyn ótkizý kezinde tárbıeshige arqasymen oryndyqta otyrǵan tárbıelenýshi M.-ge eskertý jasaǵan, biraq ol tyńdamaǵan.
Tárbıeshi bala otyrǵan oryndyqty julqyp, ony ózine tartqan. Saldarynan bala oryndyqtan qulap, jaraqat aldy. Onyń sol jaq baǵanasy jabyq kúıde synǵan», - dedi oblystyq sotta.
Sot otyrysynda prokýror 1 jyl merzimge bas bostandyǵyn shekteý jazasyn surady.
Zardap shegýshi – balanyń ákesi memlekettik aıyptaýshynyń ustanymyn tolyq qoldady. Sottalýshy kinásin moıyndap, ókindi.
«Sot jaza taǵaıyndaý kezinde sottalýshynyń qylmystyq jaýapkershiligi men jazasyn jeńildetetin mán-jaılar retinde kináni tolyq moıyndaýyn jáne ókingenin esepke aldy.
Jasalǵan qylmystyń sıpaty men qoǵamdyq qaýiptilik dárejesin eskere otyryp, sot aıyptalýshyny pedagogıkalyq laýazymdar men kámeletke tolmaǵandarmen jumys isteýge baılanysty qyzmet atqarý quqyǵynan aıyra otyryp, jazasyn óteý merziminde probaýııalyq baqylaý jazasyn belgilep, 44-baptyń 2-bóliginde kózdelgen mindetterdi júkteı otyryp 1 jyl merzimge bas bostandyǵyn shektedi», - dedi oblystyq sotta.
Sot zańdy kúshine engen joq.
Oqıǵa byltyr jazda bolǵan. Balabaqsha basshylyǵy bul oqıǵaǵa mán bermegen, al polıtsııa muny qylmys dep qarastyrmaǵan. Oblystyq bilim basqarmasynyń baspasóz qyzmeti QazAqparat tilshisine №61 balabaqsha qyzmetkerleri tártiptik jaaýapqa tartylǵanyn habarlaǵan bolatyn.