Qostanaıda balalardy táttimen aldamaq bolǵan adam izdestirilýde
QOSTANAI. QazAqparat - Tártip saqshylary balalardy táttilermen aldamaq bolǵan kúdikti er adamdy izdestirip jatyr, dep habarlaıdy QazAqparat tilshisi.
Oqıǵa Qostanaı aýdanynda bolǵan. Er adam aýlada oınap júrgen balalarǵa balmuzdaq, táttiler alyp beretinin aıtqan. Alaıda, balalar bul usynysty quptamaǵan soń ol ketip qalǵan. Munan soń 48 jastaǵy aýdan turǵyny polıtseılerge habar bergen.
«Ata-analar kúdiktini ózderi izdep bastaǵan. Qazir bul iske ýchaskelik, ınspektorlar men jol-patrýldik polıtsııasynyń qyzmetkerleri aralasty. Tártip saqshylary mektepterde de profılaktıkalyq jumystar júrgizýde»,-dedi oblystyq ІІD baspasóz hatshysy Irına Bejenar.
