Qostanaıda balalar lagerindegi ashanadan ishek taıaqshasy anyqtaldy
ASTANA. KAZINFORM — Qostanaı oblysyndaǵy jazǵy balalar lageriniń korpýstary men ashanasynyń jumystary ne sebepti toqtatylǵany belgili boldy, dep habarlaıdy Kazinform tilshisi.
Qostanaı oblysy boıynsha sanıtarııalyq-epıdemıologııalyq baqylaý departamentiniń mamandary ata-analardan túsken shaǵymdardan keıin lagerge jospardan tys tekserý júrgizgen.
Tekserý qorytyndysy boıynsha Altynsarın aýdanynyń bas memlekettik sanıtar dárigeri jedel áreket etý sharalaryn qoldaný týraly birneshe qaýly shyǵarǵan.
Atap aıtqanda, ashanadaǵy toǵyz qyzmetker mindetti medıtsınalyq tekserýden jáne gıgıenalyq oqytýdan ótpegendikten, ýaqytsha jumysynan shettetildi.
Sondaı-aq sanıtar dárigerler balalardy tamaqtandyrýda qoldanýǵa tyıym salynǵan birqatar ónimdi paıdalanýǵa jol bermedi. Olardyń qatarynda — ósimdik-maı qospasy (spred), irimshik ónimi, úı jaǵdaıynda óndirilgen sút pen jumyrtqa, sondaı-aq jemis shyryndary bar.
Budan bólek, № 2 jáne № 3 uıyqtaıtyn korpýstardyń jumysy ýaqytsha toqtatyldy, sebebi onda sý jylytqyshtar jumys istemegen. № 4 korpýs ta qoljýǵyshtyń isten shyǵýy jáne káriz júıesiniń bitelýi saldarynan jabylǵan.
Lagerdiń as blogy da ýaqytsha jabyldy. Tekserý kezinde onda sý jylytqyshtyń istemeıtini, ortalyqtandyrylǵan sýyq sýmen jabdyqtaý júıesiniń joqtyǵy jáne rezervýarda sý qorynyń bolmaǵany anyqtaldy. Sanıtarlyq-gıgıenalyq nysandardyń jaǵdaıy qanaǵattanarlyqsyz bolyp, qoljýǵyshtar sý joqtyǵy men káriz júıesiniń bitelýine baılanysty jumys istemegen.
Jedel shara qoldanýǵa negiz bolǵan buzýshylyqtardan bólek, mamandar kóptegen sanıtarlyq normalardyń saqtalmaǵanyn anyqtaǵan.
Mysaly, sanıtarlyq toraptardyń aınalasy qoqysqa toly bolǵan. Dezınfektsııalaý quraldaryn paıdalana otyryp kúndelikti tazalaý júrgizilmegen, ájethanalar mańynan qoqys, paıdalanylǵan dárethana qaǵazy, salfetkalar men nájis qaldyqtary tabylǵan, al ashana janynda turmystyq qaldyqtar úıilip qalǵan.
Uıyqtaıtyn korpýstardyń sanıtarlyq jaǵdaıy da qanaǵattanarlyqsyz dep tanylǵan. Sanıtarlyq toraptarda jýý jáne dezınfektsııalaý quraldary bolmaǵan, kúndelikti ylǵaldy tazalaý sapasyz júrgizilgen. Matrastar, jastyqtar, kórpeler, pledter men tósek-oryn jabdyqtary las bolyp, jaǵymsyz ıis shyqqan.
Sonymen qatar, uıyqtaıtyn korpýstardan synǵan terezeler tabylǵan, balalarǵa arnalǵan aýyz sýdyń qory men bir rettik stakandar bolmaǵan.
As blogynda sý qyzdyrýǵa arnalǵan elektr qazany jáne tońazytqysh jabdyqtary isten shyqqan, onyń ishinde táýliktik synamalar saqtalatyn qurylǵylar da bar.
Tekserýshiler azyq-túlikti saqtaý erejeleriniń buzylǵanyn da anyqtady: shıki qus eti, sıyr eti jáne taýyq jumyrtqalary pisirilgen qaraqumyq botqasymen birge saqtalǵan.
Shaıǵa arnalǵan shyny ydystardyń jarylǵany jáne jaryqtary bary, sondaı-aq olardyń durys jýylmaı, betinde maıly qara qabat qalǵany anyqtaldy. As blogynda daıyn taǵamdardyń táýliktik synamalary alynbaǵan, qyzmetkerler sanıtarlyq kıimmen qamtamasyz etilmegen.
Eń alańdatarlyq jaǵdaılardyń biri zerthanalyq taldaý nátıjeleri boldy.
—Zerthanalyq zertteý nátıjeleri boıynsha daıyn taǵamdar tehnıkalyq reglament talaptaryna sáıkes kelmeıtini anyqtaldy. Atap aıtqanda, qaınatylǵan qyzylshadan jasalǵan salat pen vermıshel sorpasynan ishek taıaqshasy bakterııalary tabyldy. Sonymen qatar, syrtqy orta obektilerinen alynǵan súrtindilerdiń 50%-ynan da ishek taıaqshasy anyqtalǵan. Ol stakandardan, birinshi jáne ekinshi taǵamǵa arnalǵan tabaqtardan, nan kesetin taqtaıshadan, tuzdyq quıatyn ojaýdan, garnır eleýishinen, nan saqtaıtyn sóre men ydystan, sondaı-aq taratý jáne as ishetin ústelderden anyqtalǵan, — dep habarlady Qostanaı oblysy sanıtarııalyq-epıdemıologııalyq baqylaý departamenti.
Anyqtalǵan buzýshylyqtar boıynsha jeke kásipkerge ÁQBtK-niń 425-babynyń 1-bóligine sáıkes 346 myń teńge kóleminde ákimshilik aıyppul salyndy. Sondaı-aq barlyq anyqtalǵan buzýshylyqtardy joıý týraly sanıtarlyq uıǵarym berildi.
Qazirgi ýaqytta prokýratýra organdarynda jospardan tys tekserý aktisi tirkelgen. Baqylaý sharasynan keıin mamandar buryn qabyldanǵan jedel sharalardyń oryndalýyn jáne buzýshylyqtardyń joıylýyn baǵalaıdy.
Buǵan deıin áleýmettik jelilerde ata-analar «Svetofor» lagerindegi balalardyń jaǵdaıyna qatysty shaǵym aıtqan bolatyn. Ol kezde aqparatqa oblystyq bilim basqarmasy men sanıtarııalyq-epıdemıologııalyq baqylaý departamenti túsinikteme bergen.
Sondaı-aq, jaqynda Aqmola oblysyndaǵy balalar lagerinde alty bala ýlanǵany belgili boldy.
