Qostanaıda bala týý kórsetkishi tómendegen
QOSTANAI. QazAqparat - Qostanaıda sońǵy bes jylda bala týý kórsetkishi kúrt tómendep ketken. Bul týraly oblystyq aýrýhanada ótken jıynda oblystyq densaýlyq saqtaý basqarmasy basshysynyń orynbasary Ekaterına Slabodenıýk málimdedi, dep habarlaıdy QazAqparat.
Vedomstvo aqparaty boıynsha, Qostanaı oblysy bala týý kórsetkishi tómen óńirlerdiń qataryna enedi. Máselen, 2015 jyly 12 729 náreste dúnıege kelse, 2016 jyly - 12535, 2017 jyly 11 733 sábı týǵan.
«Ananyń perınataldyq kezeńdegi jaǵdaıy týý kórsetkishiniń tómen bolýynyń sebebi bolyp otyr. Al sábı óliminiń úlesi bıyl 12,3 paıyzdy qurady. Byltyr 0-5 jas aralyǵyndaǵy 144 bala kóz jumdy. Onyń ishinde ómirden ótken 124 balanyń jasy 1-ge tolmaǵan. Bala óliminiń kórsetkishi Arqalyq qalasy, Taran jáne Áýlıekól aýdandarynda joǵary. Osylaısha, ótken jyly oblys turǵyndarynyń sany 6,7 paıyzǵa kemigen», - dedi Ekaterına Slabodenıýk.
Jalpy, óńirde 877 myń adam turady. Qalalarda - 471 myń, al aýyldarda 406,3 myń adam tirkelgen. Mamandardyń aıtýynsha, bala týý kórsetkishiniń azaıýy erli-zaıyptylardyń ajyrasýyna tikeleı baılanysty. 2017 jyldyń qorytyndysy boıynsha, Meńdiqara aýdanynda árbir ekinshi neke buzylǵan. Buǵan qosa Altynsarın, Fedorov, Qostanaı aýdandarynda da ajyrasý faktileri jıilegen.
