Qostanaıda bala týý kórsetkishi tómendedi
QOSTANAI. QazAqparat - Qostanaıda sońǵy bes jylda bala týý kórsetkishi kúrt tómendep ketken. Bul týraly oblystyq áleýmettik tólemder jónindegi vedomstvoaralyq esep aıyrysý ortalyǵynda málim etildi, dep habarlaıdy QazAqparat tilshisi.
Atalǵan ortalyqtyń dırektorynyń orynbasary Aqbota Aldabergenovanyń sózine qaraǵanda, Qostanaı oblysy bala týý kórsetkishi tómen óńirlerdiń qataryna endi. Máselen, 2015 jyly 12 729 náreste dúnıege kelse, 2017 jyly 11 707 sábı týǵan.
«Qolda bar derekterge sáıkes, qazir oblys boıynsha 5000 aıaǵy aýyr áıel bar. Bul aldyńǵy jyldarmen salystyrǵanda áldeqaıda tómen. Týý kórsetkishiniń tómen bolýynyń naqty sebebi joq. Bolashaq analar memleket tarapynan materıaldyq kómek alyp turady. Atap aıtqanda, sábı 1 jasqa tolǵansha aı saıyn 13853 teńge tólenedi. Sondaı-aq, 91 390 teńge birjolǵy kómek retinde beriledi. Eger otbasynda tórtinshi bala ómirge kelse, onda memleket 150 myń teńge tóleıdi», - dep túsindirdi Aqbota Aldabergenova.
Ótken jyly oblys turǵyndarynyń sany 6,7 paıyzǵa kemigen. Jalpy, óńirde 877 myń adam turady. Qalalarda - 471 myń, al aýyldarda 406,3 myń adam tirkelgen.
Mamandardyń aıtýynsha, bala týý kórsetkishiniń azaıýy erli-zaıyptylardyń ajyrasýyna tikeleı baılanysty. 2017 jyldyń qorytyndysy boıynsha, Meńdiqara aýdanynda árbir ekinshi neke buzylǵan. Buǵan qosa Altynsarın, Fedorov, Qostanaı aýdandarynda da ajyrasý faktileri jıilegen.
