Qostanaıda bal arasyn ósiretin zaýyt salynady

QOSTANAI. QazAqparat – Qostanaı oblysynda bal arasyn ósiretin zaýyt ashylady, dep habarlaıdy QazAqparat Óńirlik kommýnıkatsııalar qyzmetine silteme jasap.

Qarabalyq aýylsharýashylyq tájirıbe stansasynyń 90 jyldyq mereıtoıy qarsańynda ótken alqap kúninde Qazaqstannyń omartashylar odaǵy óńirde bal arasyn ósiretin zaýyt salý usynysyn bildirdi. Bul usynysty oblys basshylyǵy qoldap otyr. Jumysty odan ári Qazaqstannyń omartashylar odaǵy damytady. Atalmysh odaq sýbsıdııalaýǵa kómek kórsetip qana qoımaı, asyl tuqymdy bal arasyn ósiretin iri zaýyttyń qurylysyna da qolǵabys etpek. Sharýashylyq qaraqumyq ónimin 60-65%, kúnbaǵysty 40-45% ulǵaıtýdy kózdeıdi.

«Bıyl Qarabalyqta omarta sharýashylyǵy qolǵa alyndy. Qarabalyq aýylsharýashylyq tájirıbe stansasy osy ýaqytqa deıin kóptegen tabystarǵa jetti. Elimizdiń astyq óndirisinde bul ǵylymı-tájirıbelik ortalyqtyń qosqan úlesi orasan zor. Búginde Qarabalyq ǵylymı-tájirıbelik stansasynyń ǵalymdary bıdaıdyń, arpanyń, basqa da dándi jáne maıly daqyldardyń, kópjyldyq shópterdiń 150 sortyn shyǵardy. Bul elimizdiń astyq ındýstrııasyna qosylǵan úlken úles dep bilemin», – dep atap ótti oblys ákiminiń birinshi orynbasary Ǵaýez Nurmuhambetov.

Esterińizge sala keteıik, osydan eki jyl buryn Elbasynyń qoldaýymen 2017-2021 jyldary agroónerkásip keshenin damytýdyń memlekettik baǵdarlamasy jandandyrylǵan edi. Bul, Qarabalyq tájirıbe stansasy sııaqty irgeli sharýashylyqtardy jumysyn odan ári damyta túsýge taptyrtpas múmkindik.