Qostanaıda azyq-túlik dúkenderiniń jumys ýaqyty qysqardy
Qostanaı oblysynda epıdemıologııalyq jaǵdaıdyń nasharlaýy baıqalady. Sońǵy aptada koronavırýstyń jańa jaǵdaılarynyń sany 2 esege jýyq ósken. Osyǵan baılanysty Qostanaı oblysy bas sanıtarııalyq dárigeri karantındik sharalardy kúsheıtý týraly birqatar sheshim qabyldady:
– Taksı júrgizýshileri men jolaýshylar mindetti túrde betperde kııýi kerek;
– Kosmetıkalyq jáne kosmetologııalyq qyzmetter kórsetetin shashtarazdar, SPA-ortalyqtar, sulýlyq salondary, manıkıýr jáne pedıkıýr qyzmetteri, massaj salondary, solıarııler - 08:00-den 19:00-ge deıin, aldyn ala jazylý boıynsha (1 kelýshige 4 sharshy metr) júredi;
– Azyq-túlik dúkenderi, sonyń ishinde shaǵyn marketter, sýpermarketter, gıpermarketter 08:00-den 21:00-ge deıin ǵana jumys isteıdi;
– Jınalystar men otyrystardy qashyqtan ótkizý múmkindigi bolmaǵan jaǵdaıda ǵana kúndizgi rejımde ótkizýge bolady. Árıne, barlyq sanıtarlyq normalar saqtalady;
– 65 jastan asqan adamdarǵa jáne halyqtyń áleýmettik qorǵalatyn toptaryna qajetti taýarlardy, azyq-túlik pen dári-dármekterdi jetkizýmen aınalysatyn eriktilerdiń jumys tobyn jandandyrý;
«Polıtsııa departamenti qyzmetkerlerine turǵyn úı sektoryn, bazarlardy, saýda nysandaryn, saıabaqtardy, skverlerdi, aýlaishilik balalar oıyn jáne sport alańdaryn, qoǵamdyq kólikti patrýldeý quqyǵy beriledi. Maska rejımi men áleýmettik qashyqtyqty saqtaý tekseriledi. Ýchaskelik qyzmet toby otbasylyq, ujymdyq jáne basqa da buqaralyq is-sharalardy (úılený toılary, eske alý jáne t.b.) anyqtaıdy. Árbir tártipbuzýshylyqqa keıinnen oblystyń sanqyzmetine beriletin baıanhat resimdeletin bolady. Sondaı-aq, polıtsııa qyzmetkerleri úı karantınindegi adamdardy da baqylaıdy», delingen Qostanaı oblysy bas sanıtarııalyq dárigeriniń jańa qaýlysynda.
