Qostanaıda azyq-túlik baǵasyn turaqtandyratyn qor quryldy
QOSTANAI. QazAqparat - Qostanaı oblysy ákimdiginde áleýmettik mańyzy bar azyq-túlik taýarlarynyń baǵalaryn turaqtandyrý máseleleri talqylandy. Oblys ákimi Arhımed Muhambetov aýdan, qalalardyń basshylaryna azyq-túlik baǵasyn baqylaýda ustaýǵa tapsyrma berdi, dep habarlaıdy QazAqparat tilshisi.
Oblystyq aýyl sharýashylyǵy basqarmasynyń basshysy Darhan Ábdikárimovtiń sózine qaraǵanda, azyq-túlik taýarlarynyń baǵalaryn turaqtandyrý máselesi jóninde jumys toby quryldy.
«Búginge deıin áleýmettik mańyzy bar 19 azyq-túlik taýarynyń baǵasy tómendegen. Atap aıtqanda, un - 7%, qaraqumyq jarmasy - 27%, kúnbaǵys maıy - 12%, qant - 7%, jumyrtqa - 10%, sábiz - 3% jáne qyzylsha baǵasy 1%-ǵa kemigen. Baǵany turaqtandyrý boıynsha jyl basynan beri 272 jármeńke ótkizildi. Munda 4 myń tonna ónim ótkizildi. Jyl sońyna deıin taǵy da 3 aýylsharýashylyq jármeńkesin uıymdastyramyz.
Munyń syrtynda, qalalar men aýdandardyń ákimdikteri saýda jelileri jáne taýar jetkizýshilermen 806 memorandým jasaǵan. Kelisimge sáıkes, áleýmettik mańyzy bar azyq-túlikter óz baǵasynan 5 paıyzdan artyq qymbattamaıdy.
«Azyq-túlik baǵasyn turaqtandyrý qory quryldy. Osyǵan oraı aılyq jospar bekitildi. Qoldaǵy málimet boıynsha, qorǵa jalpy somasy 528 mln teńge bolatyn 2950 tonna azyq-túlik satyp alyndy», - dedi Ábdikárimov.
Degenmen, keı taýarlardyń shamadan tys qymbattaǵany baıqalady. Máselen, Qostanaı dúkenderinde sıyr eti - 18%, kartop - 34%, taýyq eti - 11%, jýa - 32%, kúrish 13%-ǵa qymbattap otyr.
«Óńirde jemshóp quny sharyqtap ketti. Tıisinshe, sıyr etiniń de baǵasy sonshalyqty artty. Byltyrǵy jyldyń sońynda sıyr etiniń bir kelisi 800-1000 teńgeden satylsa, búginde ol 300-400 teńgege qymbattap ketti. Oǵan qosa eldiń basqa oblystaryna eksportqa shyǵaryp otyrmyz. Al kartopqa degen suranys joǵary. Sol sebepti ónim óndirýshiler baǵany turaqty ustap otyrǵan joq», - dedi basqarma basshysy.
