Qostanaıda azamattyń baspana kezegine turǵan kúni 11 jylǵa keri shegerildi
ASTANA. KAZINFORM — Qostanaı oblysynda ata-anasynyń qamqorlyǵynsyz qalǵan azamat sottan memlekettik turǵyn úı kezegine tirkelgen kúnin ózgertýdi talap etti. Nátıjesinde onyń kezekke turǵan ýaqyty 2020 jyldan 2009 jylǵa aýystyryldy.
Qostanaı oblysynyń mamandandyrylǵan aýdanaralyq ákimshilik sotynyń málimetinshe, talap qoıýshy 2007 jyldan beri ata-anasynyń qamqorlyǵynsyz qalǵan balalar sanatyna jatady. Ol mektep-ınternatta tárbıelengen.
2020 jyly azamat turǵyn úı alý kezegine óz betinshe tirkelgen. Alaıda keıin ózi tárbıelengen bilim berý mekemesi ony kezekke 2009 jyly-aq qoıýy kerek bolǵany anyqtalǵan.
Osyǵan baılanysty er adam turǵyn úı kezegine tirkelgen kúnin ózgertýdi talap etip, «Otbasy bankine» qarsy sotqa talap aryz bergen.
Іsti sotta qaraýǵa daıyndaý barysynda taraptar medıatsııa tártibimen kelisimge kelgen.
Sottyń habarlaýynsha, medıatsııalyq kelisimniń sharty boıynsha jaýapker talap qoıýshynyń memlekettik turǵyn úı qorynan baspana alý kezegine tirkelgen kúnin 2020 jyldan 2009 jylǵa aýystyrýǵa mindettengen.
Sot bul kelisimdi bekitti. Qazirgi ýaqytta taraptar qol jetkizgen ýaǵdalastyq tolyq oryndalǵan.
Sot málimetinshe, 2026 jyldyń basynan beri Qostanaı oblysynda tatýlastyrý rásimderi arqyly 199 ákimshilik is aıaqtalǵan. Bul qaralǵan jáne aıaqtalǵan isterdiń jalpy sanynyń 18,7 paıyzy.
Eske sala keteıik, Ónerkásip jáne qurylys mınıstri Ersaıyn Naǵaspaev elimizde 846 myńnan astam adam baspana kezeginde turǵanyn aıtty.
