Qostanaıda aıtysker aqyn Saltanat Ótelbaeva men joldasy jol apatynan kóz jumdy
ASTANA. KAZINFORM – Aıtysker aqyn, mádenıet salasynyń úzdigi, tarıh ǵylymdarynyń magıstri, Ybyraı Altynsarın memorıaldyq mýzeıi basshysynyń orynbasary Saltanat Ótelbaeva jol-kólik oqıǵasynan qaza tapty.
Qaraly habardy áriptesi Marǵulan Ospanov áleýmettik jelidegi paraqshasynda jetkizdi.
– Búgin aıtysker aqyn, mádenıet salasynyń úzdigi, tarıh ǵylymdarynyń magıstri, Ybyraı Altynsarın mýzeıi basshysynyń orynbasary Saltanat Ótelbaeva jol apatyna túsip, jubaıy Myrzabek Qasymov ekeýi de qaza tapty, – dep jazdy ol.
Marǵulan Ospanovtyń aıtýynsha, Saltanat Amantaıqyzy sanaly ǵumyryn mádenıet pen mýzeı isine, tarıhı-mádenı murany saqtaý men nasıhattaýǵa arnaǵan.
Ol óz isiniń bilikti mamany retinde joǵary kásibıligimen, jaýapkershiligimen jáne uıymdastyrýshylyq qabiletimen erekshelendi. Onyń jetekshiligimen mýzeıde kóptegen mańyzdy jobalar, kórmeler men ǵylymı-zertteý jumystary júzege asyryldy.
Áriptesteri arasynda zor qurmetke ıe bolǵan Saltanat Ótelbaeva ashyq minezdi, meıirimdi ári parasatty jan retinde este qaldy.
– Onyń adal eńbegi, týǵan elge degen súıispenshiligi men azamattyq ustanymy keıingi býynǵa ónege bolyp qala beredi. Otbasy men týǵan-týystaryna qaıǵyryp kóńil aıtamyn, – dedi áriptesi.
Osyǵan deıin áıgili qazaq aqyny, dramatýrg, qoǵam qaıratkeri, Qazaqstannyń Eńbek Eri, Halyq jazýshysy Muhtar Shahanov 84 jasqa qaraǵan shaǵynda dúnıeden ótkenin jazǵanbyz.
