Qostanaıda aımaqtyq medıaforým ótti
QOSTANAI. QazAqparat - Qostanaıda Baılanys jáne aqparat qyzmetkerleri kúnine oraı aımaqtyq medıaforým ótti. Oǵan óńir ákimi Arhımed Muhambetov qatysty, dep habarlaıdy QazAqparat tilshisi.
«Búginde Qostanaı oblysynda 120-dan astam BAQ tirkelgen. Olardyń árqaısysy óz óńirlerindegi mańyzdy oqıǵalardy turǵyndarǵa jetkizip keledi. Atqarýshy bılik ókilderi de baspa quraldary, telearnalar men radıolar arqyly qostanaılyqtardy tolǵandyratyn máselelerdi bilip otyr. BAQ bılik pen halyq arasyndaǵy altyn kópir sanalady. Sondyqtan da Baılanys jáne aqparat qyzmetkerleri kúniniń mańyzy zor. Bıyl 1993 jyly qyzmet kórsete bastaǵan «Alaý» telearnasy - 25 jyldyǵyn, Taran aýdandyq «Shamshyraq-Maıak» gazeti 80 jyldyq mereıtoıyn atap ótedi. Barsha BAQ ókilderin tól merekelerimen quttyqtaımyn», - dedi Arhımed Muhambetov medıaforýmnyń ashylý saltanatynda.
Ákim sózinen soń Elena Tórebekova, Tatıana Bashkatova syndy aqparat jáne baılanys salasynyń mamandary baıandama oqydy. Sondaı-aq, Astanadan arnaıy shaqyrtýmen kelgen qonaqtardyń arasynda Qanat Áýesbaı, Mıhaıl Dorofeev syndy mamandar boldy. Olar jergilikti jýrnalısterge semınar-sabaq ótkizdi.
Medıaforým L.Tolstoı atyndaǵy oblystyq kitaphanadaǵy jýrnalıster semınarymen jalǵasty. Sarapshylar aqparattyq saıasat, aqparattyq kontent, ınternet portaldardaǵy maqalalar taqyryptarynda dáris oqydy.
Aıta keteıik, búgin eńbegimen elengen birqatar BAQ qyzmetkeri oblys ákiminiń arnaıy syılyǵyna jáne túrli alǵys-marapattaryna ıe boldy. Olardyń arasynda «QazAqparat» HAA Qostanaı oblysyndaǵy menshikti tilshisi Janna Musabaeva da bar. Áriptesimiz «Óńirlerdiń damýy - eldiń damýy» atalymynda jeńimpaz atandy.
