Qostanaıda áıel erinniń sátsiz plastıkasy úshin 1,3 mln teńgeden asa ótemaqy aldy
ASTANA. KAZINFORM — Qostanaıda lıtsenzııasy joq maman jasaǵan erin plastıkasy sotqa jetti.
Qostanaı qalalyq sotynda azamatsha G.-nyń azamatsha K.-ǵa aqshalaı qarajatty qaıtarý jáne moraldyq zııandy óteý týraly talap qoıýy boıynsha azamattyq is qaraldy.
Sotta anyqtalǵandaı, 2024 jylǵy qazanda jaýapker talapkerge heıloplastıka (erin plastıkasy) operatsııasyn jasap, ol úshin 120 000 teńge alǵan. Keıin alǵashqy operatsııanyń nátıjesi talapkerdi qanaǵattandyrmaǵandyqtan, 2025 jylǵy sáýirde quny 90 000 teńge bolatyn qaıta operatsııa jasalǵan.
Ýákiletti organ júrgizgen tekserý barysynda jaýapkerdiń «Plastıkalyq hırýrgııa» mamandyǵy boıynsha maman sertıfıkatynyń jáne medıtsınalyq qyzmetpen aınalysýǵa arnalǵan lıtsenzııasynyń bolmaǵany anyqtalǵan.
Іs boıynsha keshendi sot-medıtsınalyq saraptama taǵaıyndaldy. Saraptama qorytyndysyna sáıkes, operatsııalar barysynda tinderdiń shamadan tys alynýy saldarynan talapkerdiń joǵarǵy erninde tyrtyqty deformatsııa qalyptasqan. Júrgizilgen hırýrgııalyq aralasýlar men týyndaǵan zardaptardyń arasynda tikeleı sebep-saldarlyq baılanys anyqtalǵan. Talapkerdiń densaýlyǵyna keltirilgen zııan ortasha aýyrlyqtaǵy zııan retinde baǵalanǵan.
Sot jaýapkerdiń tıisti beıindik bilimi men lıtsenzııasy bolmaı turyp medıtsınalyq qyzmet kórsetkenin, sondaı-aq medıtsınalyq qujattamany rásimdemegenin, sonyń saldarynan talapkerdiń densaýlyǵyna zııan keltirilgenin anyqtady.
— Sot sheshimimen talap qoıý ishinara qanaǵattandyryldy. Jaýapkerden talapkerdiń paıdasyna 210 000 teńge — operatsııalar úshin tólengen qarajat, 700 000 teńge — moraldyq zııannyń ótemaqysy jáne 457 000 teńge — sot saraptamasyn júrgizýge jumsalǵan shyǵyn óndirildi. Sot sheshimi zańdy kúshine engen joq, — delingen habarlamada.
Buǵan deıin júktiligi úzilip, múgedektik alǵan áıel aýrýhanadan 5 mln teńge óndirip alǵanyn jazdyq.
