Qostanaıda avtojoldardyń sý tasqynyna daıyndyǵy tekserildi
QOSTANAI. QazAqparat - Qostanaı oblysynyń ákimi Arhımed Muhambetov Áýlıekól, Qarasý aýdandaryna baryp, tasjoldardyń sý tasqynyna qarsy sharalar daıyndyǵymen tanysty, dep habarlaıdy QazAqparat.
Kóktemgi sý tasqyny oblys aýmaǵyndaǵy respýblıkalyq mańyzy bar joldarǵa aıtarlyqtaı zalal keltirýi múmkin. Máselen, jaqynda qar sýynyń erýi saldarynan oblys aýmaǵyndaǵy «Ekaterınbýrg-Almaty» respýblıkalyq tasjolynyń ústinen sý júrip ketti. «QazAvtoJol» Qostanaı oblysy fılıalynyń dırektory Andreı Gorvat baıandaǵandaı, bıyl «Ekaterınbýrg-Almaty» avtojolynyń 714-716 shaqyrymyna kópir salynady. Qurylys jumystary 2019 jyldyń naýryz aıanda aıaqtalmaq. Joba quny - 791 mln teńge.
«Oblystaǵy respýblıkalyq mańyzdy joldyń uzyndyǵy 1 410 shaqyrym. Onyń 1 363,7 shaqyrymyndaǵy jóndeý jumystary «QazAvtoJol» AQ tıesili. Ótken 3 jyldyń tájirıbesine súıenip, bıyl sý júrip ketýi yqtımal 37 jol telimin anyqtadyq. Ol aýmaqtardaǵy jumystardy barynsha kúsheıtip jatyrmyz. Jalpy, respýblıkalyq mańyzdy joldarda 30 kópir 731 sý ótkizgish qubyr bar. Jaqynda atalǵan qurylystardy qardan tazarttyq», - dedi A.Gorvat.
Alaıda, oblys ákimi kez kelgen jaǵdaıǵa daıyn turý kerektigin eske saldy. Onyń sózinshe, qazirgi ýaqytta salǵyrttyq tanytýǵa bolmaıdy.
«Bıyl qar qalyń túspedi dep, qol qýsyryp otyr bermeńizder. Ózenderdegi sý deńgeıi de ázirge tómen. Biraq, kez kelgen ýaqytta sý kóterilip ketýi múmkin. Sol sebepti, kúni túni kezekshilik uıymdastyryńyzdar. Tasqynǵa qarsy kúres jaǵdaıy qatań baqylaýda ustalýy kerek. Buan qosa sý qory bar gıdrotehnıkalyq nysandar da erekshe nazarda bolsyn», - dedi Arhımed Muhambetov.
Munan soń aımaq basshysy Qarasý ózenindegi muz jarý jumystaryn baqylady. Andreı Gorvat aıtqandaı, bul jumystar seń júrý bastalǵanǵa deıin júrgizilýi tıis. Sondaı-aq, ol sý tasqyny basýy qaýpiniń aldyn alý úshin qajet.
Belgili bolǵandaı, bıyl oblysta 10 sý ótkizý qubyry qalpyna keltiriledi. Atap aıtqanda, Arqalyq-Jezqazǵan, Qostanaı-Sarykól, Jitiqara-Myqtykól-RF shekarasy jáne Qostanaı-Uzynkól-SQO shekarasy baǵytyndaǵy sý ótkizý qubyrlary jańarmaq. Oǵan bıýdjetten 31 mln teńge qarastyryldy.
