Qostanaıda avtokólik qurastyrý kólemi artady
QOSTANAI. QazAqparat – Qostanaı oblysynda avtomobıl óndirisiniń kólemi artady. Bul týraly oblys ákimi Arhımed Muhambetov instagram paraqshasynda jazdy, dep habarlaıdy QazAqparat.
Búgin Arhımed Muhambetov «Allıýr kompanııalar toby» AQ men Ózbekstan Respýblıkasyndaǵy mashına jasaý kóshbasshysy – «Ýzavtosanoat» AQ basshylyǵymen kelissózder júrgizdi. Aıta keteıik, «Ýzavtosanoat» AQ — Chevrolet jáne Ravon markaly avtomobıl shyǵaratyn ózbek holdıngtik kompanııasy.
«Kelissózder barysynda avtomobıl qurastyrý salasyndaǵy yntymaqtastyqty odan ári damytý máseleleri talqylandy. «Allıýr kompanııalar tobynyń» quramyna kiretin «SaryarqaAvtoprom» JShS alańynda Qazaqstanda úlken tanymalǵa ıe Ravon markaly avtomobılder óndiriledi. 2019 jyly osy markaly 5,4 myń avtomobıl shyǵaryldy.
Kelissózder qorytyndysy boıynsha aǵymdaǵy jyly Ravon avtomobılderi óndirisiniń aınalymyn 90 mlrd teńge kóleminde 3 jáne odan da kóp ese keńeıtýdi josparlap otyrmyz», - dep jazdy óńir basshysy.
Arhımed Muhambetov qos el ókilderiniń kezdesýi avtomobıl jasaýdy damytý men áriptestik qatynasty nyǵaıtýǵa septigin tıgizetinin atap ótti.
