Qostanaıda avtobýspen soqtyǵysqan kólik júrgizýshisi qaza tapty
ASTANA. KAZINFORM — Qostanaıda Volkswagen Passat jeńil kóligi men jolaýshylar avtobýsy soqtyǵysyp, bir adam qaza tapty. Taǵy bir adam aýrýhanaǵa jetkizildi, dep habarlaıdy Kazinform tilshisi.
Polıtsııanyń málimetinshe, jol apaty 25 qazan kúni keshke bolǵan. Volkswagen Passat kóliginiń júrgizýshisi jol qozǵalysy erejelerin buzyp, polıtsııa qyzmetkerleriniń toqtaý týraly talabyna baǵynbaı, qozǵalysyn jalǵastyrǵan.
Nursultan Nazarbaev dańǵyly men Altynsarın kóshesiniń qıylysynda júrgizýshi baǵdarshamnyń tyıym salynǵan túsine ótip, jolaýshylar avtobýsymen soqtyǵysqan.
Apat saldarynan jeńil kóliktiń júrgizýshisi oqıǵa ornynda qaza tapty, al jolaýshysy aýrýhanaǵa jatqyzyldy.
Soqtyǵys kezinde avtobýsta 55 adam bolǵan. Olardyń ekeýine medıtsınalyq kómek oqıǵa ornynda kórsetildi.
Oqıǵaǵa qatysty polıtsııa sotqa deıingi tergeýdi bastady. Qazir jol apatynyń mán-jaıy anyqtalyp jatyr.
Eske salaıyq, buǵan deıin SQO-da bes kólik soqtyǵysqan jol apatynan qaza tapqandar sany tórt adamǵa jetkenin habarlaǵan edik.
