Qostanaıda avtobýs buzylyp, 25 adam qaýipsiz jerge jetkizildi

ASTANA. KAZINFORM — Búgin 112 nómirine Qostanaı oblysynyń Fedorov aýdanynan 10 shaqyrym qashyqtyqtaǵy respýblıkalyq mańyzy bar «Almaty–Ekaterınbýrg» avtojolynda sheteldik azamattar mingen avtobýs buzylǵany týraly habarlama tústi.

TJM baspasóz qyzmetiniń aqparatyna sáıkes kólikte barlyǵy 66 adam bolǵan, onyń 2-i bala. Olar Reseı Federatsııasynan Tájikstan Respýblıkasyna qaraı jol júrip bara jatqan.

— Oqıǵa ornyna TJM qutqarýshylary jumyldyrylyp, 25 adamdy, onyń ishinde 1 júkti áıel men 2 balany Fedorov aýylyndaǵy jylytý pýnktine jetkizdi. Sonymen qatar, jol qyzmeti buzylǵan avtobýs pen onyń ishindegi adamdardy Fedorov aýylyna deıin súırep jetkizdi, — delingen habarlamada.

Budan buryn Pavlodarda jolda turyp qalǵan avtobýstan 36 sheteldik qutqarylǵanyn jazǵanbyz.