Qostanaıda aýyzsý qunyn tómendetý úshin sýbsıdııa bólindi
QOSTANAI. QazAqparat - 2017 jyly aýyl turǵyndary úshin aýyzsýdyń baǵasyn tómendetýge jergilikti bıýdjetten 836 myń teńgeden astam qarajat bólindi. Bul týraly oblys ákimdiginde ótken jıynda málim etildi, dep habarlaıdy QazAqparat tilshisi.
Oblystyq energetıka jáne TKSh basqarmasynyń basshysy Almat Isenbaevtyń aıtýynsha, aýyzsýmen jabdyqtaý kózi retinde, birinshi kezekte, jerasty sýlary paıdalanylady. Oblys boıynsha 287 eldi mekendi aýyz sýmen qamtamasyz etý úshin 149 jerasty sý ótkizý orny júrgizilgen.
«Jerasty sýlary joq aýdandarda sýmen jabdyqtaý kózi retinde jerústi sý qubyrlary paıdalanylady. Sýmen jabdyqtaý jelileriniń uzyndyǵy oblys boıynsha 4050,3 shaqyrymdy quraıdy. Alaıda olardyń 46,3%-y tozǵan», - dep habarlady A. Isenbaev.
Basqarma basshysy atap ótkendeı, sý sharýashylyǵy memlekettik qoldaýǵa ıe. Sonyń biri - aýyzsý berýdi sýbsıdııalaý júıesi.
«Qostanaı oblysynda aýyzsý tarıfteri bir tekshe metr sýǵa 127,74 teńgeden 3974,66 teńgege deıin esepteledi. Al, búginde aýyl halqy úshin aýyzsý qunyn arzandatý úshin sýbsıdııa bólinip otyr. Aǵymdaǵy jyly oblystyq bıýdjetten 836 444 myń teńge qarastyryldy», - dedi A. Isenbaev.
Búgingi kúni oblystaǵy 562 eldi meken ortalyqtandyrylǵan sýmen qamtylǵan. Onyń 178-i nemese 79,1%-y - aýyldyq jerler. Al shalǵaıdaǵy 34 aýylǵa aýyz sý ortalyqtan jetkiziledi.
Memlekettik baǵdarlamalardyń júzege asýy arqyly aýyl turǵyndaryn aýyz sýmen qamtamasyz etý kórsetkishi 30 paıyzǵa ósken. Bıyl óńirlerdi damytý baǵdarlamasy boıynsha 9 joba qolǵa alyndy. Buǵan memlekettik bıýdjetten 2,6 mlrd teńge bólindi. Bul qarjynyń arqasynda 15 eldi meken aýyz sýmen qamtylady dep kútilýde.
