Qostanaıda aýyr jumys isteıtin názik jandylar sany kóbeıdi
QOSTANAI. QazAqparat - Qostanaı oblysynda metall óńdeý, ken óndirý salasynda jumys isteıtin áıelderdiń qatary ósken, dep habarlaıdy «QazAqparat» HAA oblystyq eńbek ınspektsııasy basqarmasynyń basshysy Maksım Morgýnovqa silteme jasap.
Basqarma basshysy aıtqandaı, óńirde asa zııandy, qaýipti jáne aýyr mamandyq boıynsha 3 myńǵa jýyq adam jumys istep júr. Bul oblystaǵy jumyspen qamtylǵandardyń 2,8%-yn quraıdy.
«Qaýipti jáne zııandy óndiristik faktorlardyń kórsetkishterin aıqyndaý, óndiristegi eńbek gıgıenasy Qazaqstan Respýblıkasynyń Úkimeti bekitken sanıtarlyq qaǵıdalarda, gıgıenalyq normatıvterde kózdelgen tártippen júzege asyrylady. Búginde oblysta 16,3 myń adam sanıtarlyq-gıgıenalyq talaptarǵa sáıkes kelmeıtin jumystarǵa tartylǵan. Onyń ishinde 4,7 myńy nemese 30%-y áıelderdiń úlesinde», - dedi Maksım Morgýnov.
Oblysta metall óńdeý, qurylys, ken óndirisi syndy jumystarda názik jandylardyń eńbegi kóptep paıdalanylady. Máselen, «Qostanaı mıneraldary» AQ quramynda 600-den astam áıel asbest óndirý jumystarymen aınalysady. Budan bólek «Varvarınskoe» metall óndiretin kásipornynda 153 áıel jumys isteıdi. Eńbek ınspektsııasy basqarmasynyń málimdemesi boıynsha, 81 áıel qaýipti dep sanalatyn qyzmetterde eńbektenýde. Bul kórsetkish ótken jyldarmen salystyrǵanda áldeqaıda ósken deıdi basqarma basshysy.
