Qostanaıda aýyr júk kólikterimen taýar tasymaldaýshylardy tonaýmen aınalysyp júrgen qylmystyq top qolǵa tústi
ASTANA. Maýsymnyń 2-si. QazAqparat /Aıdar Ospanalıev/ - Qostanaıda aýyr júk kólikterimen taýar tasymaldaýshylardy tonaýmen aınalysyp júrgen qylmystyq top qolǵa tústi. Bul týraly búgin jýrnalıstermen bolǵan brıfıngte Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti,
dep habarlaıdy QazAqparat.
Onyń derekterine qaraǵanda, Qostanaı, Pavlodar, Qyzylorda jáne Aqtóbe oblystarynyń 9 júk kóliginiń júrgizýshisi Aqtóbe oblystyq Іshki ister departamentine baryp, «Aqtóbe-Qostanaı» avtojolynyń boıynda belgisiz bireýlerdiń aqsha bopsalaýmen aınalysyp júrgendigine shaǵymdanǵan. Shaǵymdanýshylardyń sózderi boıynsha, júrgizýshiler túngi mezgilde demalyp otyrǵan kezde olarǵa belgisiz bireýler kelip, qorqytyp 250 myń teńgelerin tartyp alǵan. «Arnaıy júrgizilgen jedel-izdestirý sharasynyń barysynda Qostanaı qalasynda Aqtóbe oblysynyń 20 men 40 jas aralyǵyndaǵy 5 azamaty qolǵa túsip, olardan tartyp alynǵan aqsha men ózge de múlikter alyndy», dedi departament bastyǵy.
