Qostanaıda aýylsharýashylyq klasteri qurylady
QOSTANAI. QazAqparat - Oblys ákimi Arhımed Muhambetov Qostanaı aýdanyndaǵy «Seıdahmetov E.S» sharýa qojalyǵynyń jumysymen tanysty, dep habarlaıdy QazAqparat tilshisi.
«Seıdahmetov E.S» sharýa qojalyǵynyń qurylǵanyna 6 jyl bolǵan. Osy ýaqyt aralyǵynda qojalyq memlekettik baǵdarlamalarǵa qatysyp, túrli qajettilikterge 800 mln teńge jumsady.
«Mal sharýashylyǵy keshen-reprodýktoryn damytý aıasynda iri qara mal satyp alý jyldyq jospardan túsken emes. 2012-2013 jyldary Kanadadan «angýs» tuqymynan 600-den astam iri qara malyn satyp aldyq. Sebebi, túliktiń bul tuqymy óńirdiń klımattyq jaǵdaıyna jaqsy beıimdelgen. Qazir qolda 650 asyl tuqymdy analyq mal basy bar. Endigi másele mal jaıatyn alqaptyń jetispeýi bolyp tur. Amal joq, jaz kezinde 100 shaqyrymda ornalasqan Taran aýdanyndaǵy jaıylymǵa aparamyz. Oǵan ketetin shyǵyn da qaltaǵa salmaq túsiredi», - deıdi sharýa qojalyǵynyń basshysy Ersin Seıdahmetov.
Sharýalarmen kezdesý barysynda oblys ákimi aımaqtaǵy aýylsharýashylyq klasterlerin damytýdyń mańyzyna toqtaldy.
«Qazir oblysta 4 iri klaster jumys isteıdi. Olar: Arqalyq et kombınaty, Qarabalyqtaǵy «Terra» sharýashylyǵy jáne Qostanaıdaǵy «Mılh» zaýytynyń bazasy. Tórtinshi klasterge maı ekstraktsııalaý zaýytynyń alqaby jatady. Endi qala shetinen taǵy bir aýylsharýashylyq klasterin qurýdy tapsyramyn. Eger «Seıdahmetov E.S» ShQ alǵan qarqynynan tanbasa, onda jańa baza osynda qurylýy múmkin», - dedi Arhımed Muhambetov.
Munan soń Ersin Seıdahmetov ózi basqaratyn qojalyqtyń bazasymen tanystyrdy. Onyń sózinshe, byltyr memlekettik baǵdarlamalar arqyly mal soıý pýnkti men veterınarlyq bólimshe jańarǵan. Buǵan qosa 4 júk kóligi men 8 traktor satyp alynǵan. Sharýa qojalyǵynda barlyǵy 20 adam jumys isteıdi. Olardyń aılyǵy 70-90 myń teńge arasynda.
