Qostanaıda aýylǵa baratyn dárigerlerdiń ústemaqysy kóterildi
Búginde medıtsına kolledjinde jalpy sany 594 shákirt bilim alýda. Onyń 154-i indetke qarsy kúrestiń aldyńǵy shebinde júr. 20 stýdent provızorlyq statsıonarlarǵa jumysqa ornalasqan. Osy jyly medıtsınalyq kolledjdi 264 túlek támamdap, mamandyqtaryna saı sertıfıkattaryn qoldaryna aldy. Sonyń ishinde 50 túlek birden feldsher, medbıke, akýsher mamandyqtary boıynsha jumysqa shyǵyp ketken. Solardyń biri – 2-kýrs stýdenti Janar Saqymjanova. Onyń aıtýynsha, qazirgi ýaqytta jaǵdaı turaqtalyp keledi.
«Bastapqyda bárimizge ońaı tıgen joq. Stýdent bolsaq ta, medıtsınalyq jedel kómek kórsetýdiń alǵyshartyn biletin edik. Dárigerlerdiń nusqaýymen olarǵa barynshy kómek kórsetip kelemiz. Bul bir jaǵynan ózimizge sabaq boldy», - deıdi stýdent.
Jalpy, óńirde ınfektsııaǵa saraptama júrgizý jáne emdeýmen 1166 maman aınalysady, olardyń 229-y – dárigerler. Oblysqa medıtsınalyq mamandardy tartý boıynsha jumys kúsheıtilgen. Ótken jyly aımaqqa 265 dáriger tartylsa, bıyl taǵy 240 dáriger keledi dep kútilýde.
«2018 jyly oblystyq bıýdjet esebinen alǵash ret «Jalpy medıtsına» mamandyǵy boıynsha 80 eresek adam men 20 stýdentti oqytý bastalǵan. Onyń 24-i bıyl oblys aýdandaryna jiberiledi. Jergilikti bıýdjetten aýyldyq jerlerge kelgen dárigerlerdiń kóterme ústemaqysy 1,5 mln teńgege deıin kóbeıtildi. Sondaı-aq, «Qazaqstandyq ıpotekalyq nesıe berý» AQ arqyly Qostanaı qalasynda 54 páter berildi. Aldaǵy ýaqytta medıtsına qyzmetkerlerine arnalǵan taǵy 120 páter beriledi», - delingen shtab aqparatynda.