Qostanaıda aýyl turǵyny granata taýyp aldy
QOSTANAI. QazAqparat - Qostanaı oblysy Qarabalyq aýdany Elshanka aýylynan áskerı granata tabyldy. Bul aqparatty Qostanaı oblysy TJD baspasóz bólimi rastady, dep habarlaıdy QazAqparat.
Halyq arasynda «lımonka» dep atalyp ketken jarylǵysh zat 56 jastaǵy turǵyn úıdiń qorasynan tabyldy.
«Polıtsııa qyzmetkerleri júrgizgen arnaıy sharalar barysynda onyń F-1 jaıaý áskerge qarsy qorǵanys granatasy ekeni anyqtaldy (azdap tot basqan), - dep túsindirdi TJD baspasóz qyzmeti. - 22 saǵat 45 mınýtta ІІD qyzmetkerleri F-1 granatasyn jarý arqyly zalalsyzdandyrdy. Zardap shekkender joq».
Qostanaı oblysy ІІD baspasóz qyzmetiniń anyqtaýynsha, úı turǵyny granatany bir jyl buryn marqum kúıeýi taýyp alǵanyn aıtýda. Ony qoraǵa ákep qoıa salǵan. Kúıeýi qaıtys bolǵan soń, jarylǵysh zatty múldem umytyp ketken. Tek, 8 aqpan kúni jesir áıel qora ishin jıystyryp júrgende taýyp alǵan.
Polıtsııa QR QK 287-baby, 3-bólimi (qarýdy, oq-dárilerdi, jarylǵysh zattardy jáne jarylǵysh qurylǵylardy zańsyz saqtaý) boıynsha sotqa deıingi tergeý amaldaryn bastady.
