Qostanaıda aýyl sharýashylyǵyn sýbsıdııalaýǵa 32,1 mlrd teńge bólindi
QOSTANAI. QazAqparat - Bıyl oblysta aýyl sharýashylyǵy salasyn sýbsıdııalaýǵa 32,1 mlrd teńge bólingen. Bul týraly oblys ákimi Arhımed Muhambetov eginjaı kúnine baılanysty ótken jıynda málim etti, dep habarlaıdy QazAqparat.
Qostanaı aýdanynyń «Zarechnyı» aýyl sharýashylyǵy tájirıbe stansasy» seriktestigi aýmaǵynda eginjaı kúni ótti. Basqosýǵa aýdandardyń ákimderi, aımaqtyń dıqandary, mal ósirýshiler, ǵylymı-zertteý ınstıtýttary, tehnıkalar men qosalqy bólshekter saýdalaý kompanııalarynyń ókilderi jınaldy. Basty taqyryp - óńirdiń aýyl sharýashylyǵy salasynda joǵary ónimdi tehnıkalar men qurylǵylaryna tsıfrlandyrýdy engizý, egistik alqaptaryn ártaraptandyrý, básekege tótep beretin daqyldar, sonyń ishinde soıanyń kólemin ulǵaıtý. Sondaı-aq, eginniń shyǵymy, kún raıy, zııankester men shegirtkege qarsy júrgizilip jatqan jumystar da nazardan tys qalǵan joq.
Osy jyly egistik alqabyn ártaraptandyrý kólemi artty. 4 mln 738 myń ga egistiktiń 530,8 myńy maıly daqylǵa tıesili. Mal azyǵynyń jer kólemi - 221,6 myń, aýyl sharýashalyǵy óndirisindegi kartop - 4,1 myń, kókónis 900 gektardy quraıdy.
Óńir basshysy Arhımed Muhambetov sala basshylary men sharýalarǵa qazirgi aımaqtaǵy jem-shóp jınaý, egindi aram shópterden tazartý naýqanynyń ýaqytynan qaldyrmaı oryndalýyn eskertti. Qazir astyq jınaý tehnıkalary men astyq qabyldaý oryndarynyń materıaldyq-tehnıkalyq bazasy 90% daıyn, bul jumysty egin orý bastalǵanǵa deıin aıaqtaýdy tapsyrdy. Arhımed Muhambetov eńbek ónimdiligin arttyrý, egistikti ártaraptandyrýdy ulǵaıtý, aýyl sharýashylyǵy men memlekettik baǵdarlamalardy kórsetkishin jospardaǵydaı oryndaý kerektigin aıtty.
«Bıyl oblysta aýyl sharýashylyǵy salasyn sýbsıdııalaýǵa 32,1 mlrd teńge bólingen. Bul az qarajat emes. Ózderińiz biletindeı, keler jyly 600 myń tonna bıdaı men 150 myń tonna maıly daqyl tuqymyn tereńdetip qaıta óńdeıtin «Bıogreın» ınvestıtsııalyq jobasy júzege asady. Osyǵan oraı maıly daqyl egistik kólemin 700 myń gekterǵa jetkizýimiz kerek. Respýblıkamyzda «Soltústik soıasy» memlekettik baǵdarlamasy júzege asýda. Sol sebepti, teriskeıdegi aýdan ákimderine 2020 jyldyń kóktemgi egistigine soıa tuqymyn alýdy tapsyramyn», - dedi oblys ákimi.
Osy jyly gerbıtsıd alý úshin 4,9 mlrd, mıneraldy tyńaıtqyshtarǵa 2,5 mlrd, tuqym jańalaýǵa 1,3 mlrd bólinip otyr. Sondaı-aq, kóktemgi egistik naýqanyna 71 myń tonna dızel otyny jetkizilip, «Agrarlyq nesıe korporatsııasy» AQ taýar óndirýshilerin 13,9 mlrd teńgege qarjylandyrǵan.
