Qostanaıda aýyl sharýashylyǵyn sýbsıdııalaýdyń ashyqtyǵyna taldaý júrip jatyr

NUR-SULTAN. QazAqparat – Qostanaı oblysynda aýyl sharýashylyǵy salasyn sýbsıdııalaý qyzmetine taldaý jumystary júrgizilip jatyr. Bul týraly QR Sybaılas jemqorlyqqa qarsy is-qımyl agenttigi Qostanaı oblystyq departamentiniń dırektory Qýanysh Bekbasov málim etti, dep habarlaıdy QazAqparat tilshisi.

«Qazirgi kúni elimiz boıynsha aýyl sharýashylyǵy salasyn sýbsıdııalaý qyzmetin saraptaý júrip jatyr. Atalǵan salada sybaılas jemqorlyqtyń oryn alý qaýpi basym, sondyqtan da tekserý, anyqtaý jumystary qolǵa alyndy. Onyń ústine bizdiń oblysta aýyl sharýashylyǵy salasy jaqsy damyǵan. Aıtar bolsaq, sońǵy 5 jyldyń ishinde Qostanaı oblysynda aýyl sharýashylyǵyn sýbsıdııalaýǵa 150 mrld teńgeden astam qarjy bólingen. Saraptama júrgizý jumystaryna quzyrly organdar ókilderi men qatar sala sarapshylary shaqyrtyldy», - dedi Q. Besbasov onlaın ótken baspasóz máslıhatynda.

Onyń aıtýynsha, saraptama jumystary aıaqtalǵan soń, onyń qorytyndysy ashyq jarııalanady.

«Saraptama jumystarynyń qorytyndysy týraly aıtýǵa áli de erte. Óıtkeni, jumys júrip jatyr. Degenmen qazirgi ýaqytta sýbsıdııa berý salasynda jumystyń ashyq júrgizilmeıtini baıqalady. Ol týraly bizge kásipkerlerdiń ózi de aıtyp jatady, ásirese sýbsıdııany resimdeý protsesiniń qıyndyǵyn alǵa tartady. Sol sekildi koldau.kz, plem.kz saıttarynyń qyzmetine aýyl sharýashylyǵy taýar óndirýshiler tarapynan shaǵymnyń baryn ańǵartyp otyr. Odan bólek, sýbsıdııa alýda normatıvtik aktilerdiń jıi ózgeretini aıtylady, ıaǵnı sýbsıdııa alǵysy kelgen qarapaıym sharýalar tolyqtyrýlar men ózgeristerdi uǵyp úlgermeıdi. Bizdiń maqsat – osy máselelerge taldaý júrgizip, túıindi sheshý. Osy oraıda belsendi azamattardy máseleni birlesip sheshýge shaqyramyz», - deıdi ol.