Qostanaıda aýtızmi bar balalarǵa arnalǵan ortalyq ashylady

QOSTANAI. QazAqparat – Qostanaı oblysynyń ákimi Arhımed Muhambetov aýtızm jáne basqa da mentaldy buzylystary bar balalarǵa arnalǵan ortalyqtyń jóndeý jumystaryn tekserdi, dep habarlaıdy QazAqparat óńir basshysynyń Instagram jelisindegi paraqshasyna silteme jasap.

Aýdany 2 myń sharshy metrden asatyn ǵımaratqa kúrdeli jóndeý qajet. «Jóndeý jumystary aıaqtalǵannan keıin «Qamqorlyq» bastamasy aıasynda aýtızm jáne basqa da mentaldy buzylystary bar balalarǵa arnalǵan ortalyq ashylady. Sondaı-aq «Belsendi uzaq ómir» bastamasy aıasynda ınklıýzıvti qoǵamdy damytýǵa jáne zeınetkerlerdi qoldaýdyń júıeli sharalary men olardy qoǵamǵa tartýǵa baǵyttalǵan belsendi uzaq ómir súrý ortalyǵy ashylady. Bul bastamalar – Elbasy N.Á. Nazarbaevtyń tapsyrmasy», – dedi A.Muhambetov.

Oblys ákimi «Aeroport» shaǵyn aýdanyndaǵy №19-20-21 jalǵa beriletin úılerdiń qurylys barysymen tanysty. Atalǵan úıler paıdalanýǵa berilgennen keıin halyqtyń áleýmettik osal toptarynan kezekte turǵandar 108 páter alady dep josparlanýda.

«Qazirgi ýaqytta qazanshuńqyrdy ázirleý aıaqtaldy, jylýmen jabdyqtaý jáne káriz jelileri demontajdaldy. Nysandarda josparlanǵan jumystar júrgizilýde. Nysandy 2022 jyldyń shilde aıynda paıdalanýǵa berý josparlanǵan», – dep qorytyndylady ákim.