Qostanaıda aýtızmge shaldyqqan balalardy qoldaý ortalyǵy ashylmaq

QOSTANAI. QazAqparat - Qostanaıda Dúnıejúzilik aýtızm týraly aqparatty taratý kúni aıasynda «Sheksiz álem!» atty qaıyrymdylyq avtosherý ótti, dep habarlaıdy QazAqparat.

Bul sharaǵa aýtızm dıagnozy bar múmkindigi shekteýli balalardyń ata-analary men «10 óńir» tobynyń avtoáýesqoılary qatysty. Avtosherýdiń maqsaty - aýtızm týraly aqparattardy taratý, aýtızmi bar balalar problemasyna jurtshylyqty tartý jáne aýtızmi bar balalarmen sabaq ótkizý úshin qajetti sensorlyq jabdyqtar satyp alýǵa arnalǵan qaıyrymdylyq qarajat jınaý.

Avtosherýge qatysqan mashınalarǵa «Sheksiz álem» degen jazýy bar aq jalaýshalar taǵyldy.

«Avtosherýge 30-dan astam otbasy qatysty. Múmkindigi shekteýli balalardyń ata-analary aýtızmge shaldyqqandardy qoldaý ortalyǵy qajet ekenin aıtady. Árıne, qalada kóptegen stýdııalar men damý ortalyqtary, túzetý mektepteri jumys isteıdi, biraq, onda balalar aqyly túrde ǵana júgine alady. Biz balalar ózara qarym-qatynas jasaı alatyn jáne bilim alatyn biryńǵaı qoldaý ortalyǵyn ashqymyz keledi. Al ata-analar, óz kezeginde, aýtızmge shaldyqqan balalardy tárbıeleý jóninde mamandardyń keńesterin bilip otyrady»,- deıdi «Stop autism» qoǵamdyq birlestiginiń jetekshisi Shynar Jalmuhambetova.

Qazir aýtızmmen aýyratyn balalardyń ata-analary osy bastamaǵa qoldaý kórsetetin demeýshi izdeýde.

Jalpy, Qostanaı óńirinde 154 bala aýtızmmen aýyratyndar esebinde tur. Mamandardyń sózinshe, budan bólek, esepke alynbaǵandary da bolýy múmkin. Óıtkeni, kóp jaǵdaıda mundaı syrqatqa shaldyqqan balalardyń ata-anasy olardy qoǵamnan oqshaýlap, kórsetpeýge tyrysady.