Qostanaıda aýa raıy kúrt ózgerdi: kóktaıǵaq túsip, qarly boran soǵady
Sınoptıkterdiń málimetinshe, óńirde aldaǵy eki kúnde kóktaıǵaq bolyp, jeldiń jyldamdyǵy sekýndyna 15-20 metrge deıin kúsheıedi. Sondaı-aq, keı aýmaqtarda qarly boran túsedi.
Aýa raıynyń kúrt qubylýyna baılanysty polıtseıler kólik júrgizýshileri men jaıaý júrginshilerdi barynsha saq bolýǵa shaqyrady. Sebebi, oblys ortalyǵynda bıyldyń ózinde jolaýshylardyń qatysýymen 81 jol-kólik oqıǵasy tirkeldi. Saldarynan 5 adam kóz jumdy, 81 adam túrli dene jaraqatymen aýrýhanaǵa jetkizildi.
«Júrgizýshilerge aýla arasynda kólik jyldamdyǵyn 20 km/saǵ asyrmaýdy eskertemiz. Sonymen qatar, jaıaý júrginshiler qoǵamdyq kólikterge minip, túskende abaı bolǵany jón. Kúnniń qysqarýy nátıjesinde kórý múmkindigi eki esege azaıady», - dep eskertedi polıtsııa qyzmetkerleri.