Qostanaıda at sporty maýsymynyń sońǵy báıgesi ótti
QOSTANAI. QazAqparat - Qostanaı aýdanynyń Zarechnyı aýylyndaǵy «Arǵymaq» ıppodromynda 2018 jylǵy at sporty maýsymy jabyldy, dep habarlaıdy QazAqparat.
Zarechnyı aýylyndaǵy «Arǵymaq» ıppodromyna jıylǵan jurt qarasy qalyń. Sebebi, munda 2018 jylǵy at sporty maýsymynyń sońǵy báıgesi uıymdastyryldy. Alaman bastalmaı turyp,turǵyndarǵa áýesqoı sportshylar «Qyz qýý» oıynyn kórsetti. Sondaı-aq, qostanaılyqtar «Teńge ilý», «Jamby atý» sııaqty ulttyq sport oıyndaryn tamashalady.
Oblystyq dene shynyqtyrý jáne sport basqarmasynyń basshysy Evgenıı Vılıamstiń sózinshe, jyl qorytyndysyna arnalǵan at sporty oıyndaryna 50 sáıgúlik qatystyryldy. Onyń ishinde alaman báıgege respýblıkanyń túkpir-túkpirinen barlyǵy 14 tulpar ákelindi.
Solardyń ishinen qaraǵandylyq Murat Esmaǵanbetovtyń arǵymaǵy máreni birinshi qıdy. Tulpar ıesi Qostanaıdaǵy «SaryarqaAvtoProm» mashına zaýytynan shyqqan JAC markaly avtokólikti mindi.
