Qostanaıda asyl tuqymdy mal arnaıy chıp arqyly qorǵalmaq
QOSTANAI. QazAqparat - Qostanaıdaǵy «Astyq ındýstrııasy» iri agroholdıngi Tsıfrlandyrý baǵdarlamasy aıasynda tórt túlikti chıpteýdi bastamaq, dep habarlaıdy QazAqparat.
Qarabalyq aýdanynda ornalasqan «Astyq ındýstrııasy» agroholdıngi quramyna «Sever-Agro N» asyl tuqymdy mal sharýashylyǵy kombınaty, «Terra» bordaqylaý alańy, «Toǵyzaq» astyq ónimderi kombınaty jáne «Aq-Bıdaı-Agro» fırmasy sekildi birqatar nysan kiredi. Búgin agroholdıngtiń aldaǵy jumys jospary men jetistikteri sheteldik ǵalymdarǵa tanystyryldy.
«Bizdiń oblysta AÓK tsıfrlandyrý pılottyq jobasyna qatysýǵa múmkindigi bar 20 kásiporyn iriktelip alyndy. Solardyń biri «Astyq ındýstrııasy» agroholdıngi óz bazasynda birneshe jańashyldyq usyndy. Osyǵan oraı tájirıbelerimen bólisý úshin Italııa, AQSh, Frantsııa, Reseı memleketteriniń ǵalymdaryn shaqyrdyq. Damyǵan elderdiń jańa tehnologııalaryn bizdiń óńirdiń aýyl sharýashylyǵyna paıdalansaq, ónimdilik qýaty áldeqaıda artady», - dedi Qostanaı oblysy ákiminiń orynbasary Meıirjan Myrzalıev.
«Astyq ındýstrııasy» agroholdıngi bas dırektory Dáýlet Ahmetqalıevtiń sózinshe, Tsıfrlandyrý baǵdarlamasy boıynsha qolǵa alynǵan jobalardyń kómegi zor.
«Jaqynda maldardy chıpteýdi bastaımyz. Osy arqyly asyl tuqymdy maldyń urlanbaýyn kompıýterden qadaǵalap otyratyn bolamyz. Sondaı-aq, bordaqylaý alańy da ozyq tehnologııa boıynsha jabdyqtalatyn bolady. Mundaǵy mal táýligine 700 gramm salmaq qosady. Qoldaǵy maldyń 20 paıyzy osy bordaqylaý alańynda, qajetti salmaq alynǵannan keıin olardy aýystyryp otyramyz, osylaı úderis jalǵasa beretin bolady. Jalpy, eshqandaı qospasyz tabıǵı jem beriletin maldan alynatyn et sapasy da joǵary bolady», - dedi D.Ahmetqalıev.
Búginde «Terra» bordaqylaý alańynda 8 myń iri qara jemdeledi. Kompanııa oblystaǵy et klasteriniń qalyptasýyna úles qosyp otyr. «Sever-Agro N» sharýashylyǵy 3500 et baǵytyndaǵy jáne 2800 sút baǵytyndaǵy asyl tuqymdy mal ósiredi. Al «Aq-Bıdaı-Agro» agrofırmasy 3-4 aýdanda 85 myń gektar alqapqa burshaq, maıly daqyldar ósirýmen aınalysady. Olardyń ishki jáne syrtqy naryqta joǵary suranysqa ıe ónimi Qarabalyq aýdanynda óńdeledi.
