Qostanaıda astyqty tereńdete óńdeıtin keshen iske qosylady
QOSTANAI. QazAqparat - Qostanaı oblysynyń ákimi Arhımed Muhambetov Áýlıekól aýdanynda salynyp jatqan bıdaıdy tereńdete óńdeý tsehynyń qurylys barysymen tanysty, dep habarlaıdy QazAqparat tilshisi.
Bıyl Áýlıekól aýdanynda «Agro-Bio-Auliekol» JShS bıdaı astyǵyn tereńdete qaıta óńdeý boıynsha bıotehnologııalyq keshen jobasyn qolǵa aldy. Atalǵan joba «Bıznestiń jol kartasy-2020» baǵdarlamasy sheńberinde júzege asyp otyr. Qyrkúıek aıynda Qostanaıda ótken halyqaralyq ınvestıtsııalyq forýmda Áýlıekól aýdanynyń ákimdigi men «Agro-Bio-Auliekol» JShS arasynda jalpy somasy 1 mlrd 460 mln teńgege teń ekijaqty qarym-qatynas jónindegi memorandýmǵa qol qoıyldy.
Búginde bul sharýashylyqta 27 adam jumys isteıdi. Tseh tolyǵymen iske qosylǵanda taǵy 53 adam shtatqa alynýy tıis. Aıtpaqshy, astyqty zertteý jumysymen aınalysatyn zerthana tseh aýmaǵyna salynady.
Jalpy, dándi daqyl egetin aýdandar ónimderdiń úsh túrin shyǵarady. Olar:bıdaı, un, kebek. Eger de Áýlıekól aýdanyndaǵy astyqty tereńdete óńdeý jobasy joǵary qarqyn alsa, onda astyqtyń 19 túrin óndirýge bolady. Bul degenińiz oblys ekonomıkasyn jańa deńgeıge kóterýge degen qadam.
«Bul jobany bıotehnologııanyń jańa jetistikterin engizý arqyly iske asyrmaqpyz. Qazirgi qolda bar múmkindikti paıdalansaq, astyqty 100% qaıta óńdeı alamyz. Óz kezeginde bul joǵary sapaly ónim alýǵa jol ashady. Osylaısha, jergilikti ónim eksportqa baǵdarlanady. Kerek jabdyqtar Almatydan alynady. Qazir kerekti qurylǵylardyń tizimin jasap qoıdyq», - deıdi seriktestik quryltaıshysy Aıgúl Kómekova.
Óz kezeginde oblys ákimi qurylys jumystaryn ýaqtyly aıaqtaýdy tapsyrdy. Sondaı-aq, bıdaıdy ǵylymı túrde zertteýge asa mán berý kerektigin aıtty.
Astyqty tereńdete óńdeıtin keshen 2018 jyldyń jeltoqsan aıynda óz jumysyn bastaıdy.
