Qostanaıda astyqty qaıta óńdeý kásiporny salynady
QOSTANAI. QazAqparat - Bıyl qostanaılyq sharýalar 5 mln 275 myń gektar alqapqa dán egýdi josparlap otyr.
Bul týraly aýylsharýashylyq taýar óndirýshileri bas qosqan dástúrli agrokeńeste oblys ákiminiń birinshi orynbasary Ǵaýez Nurmuhambetov aıtty, dep habarlaıdy QazAqparat.
Ǵaýez Nurmuhambetov aıtqandaı, jospar boıynsha 4 mln gektarǵa bıdaı egiledi. Sondaı-aq, maıly daqyldar alqaby 476 myń gektarǵa ulǵaıdy. Eske salsaq, 2018 jyly dıqandar 430 myń gektarǵa maıly daqyl ekken.
«Jyl saıyn maıly daqyldarǵa qajetti alqapty ulǵaıtý arqyly eksport kólemin biraz arttyrdyq. Máselen, osydan bes jyl buryn onyń kólemi 39 myń tonna bolsa, qazir 151 myń tonnadan asady. Óndiristiń bulaı qarqyn alýy ónimdi qaıta óńdeıtin kásiporyndardyń jumysyn 13%-ke arttyrdy, al eksport kólemi tórt esege kóbeıdi. Osy jyly 4,1 myń gektar kartop jáne 900 gektarǵa kókónis otyrǵyzylady. Bul da jaqsy jetistik. Biraq, áli de kóbeıtemiz»,-dedi oblys ákiminiń birinshi orynbasary.
Osyǵan baılanysty aýdan, qala ákimderine egistik jerlerin ártaraptandyrýǵa kúsh salyp, maıly daqyldar alqabyn áli de ulǵaıta túsý mindeti júkteldi.
Al oblys ákimi Arhımed Muhambetov ótken jylǵy oblys dıqandarynyń jumysyn jaqsy baǵalady.
«Osy qarqynnan taımaý kerek. Eń bastysy eńbek ónimdiligine mán berińizder. Sol arqyly ónim óndirý kólemi de ulǵaıady. Basty mindetimiz de osy bolýy tıis. Byltyr oblys aýylsharýashylyq taýar óndirýshileri 378 mlrd teńgeniń ónimin óndirgen. Qazir aýyl sharýashylyǵyn tsıfrlandyrý júrip jatyr. Oblysta ártaraptandyrý boıynsha qyrýar jumys atqarylýda. Áli de maıly daqyldar alqabyn kóbeıtýdi tapsyramyn», - óńir basshysy.
Jıynda belgili bolǵandaı, oblysta sońǵy úlgidegi jabdyqtarmen jaraqtandyrylǵan qaıta óńdeý kásiporny ashylatyny belgili boldy. Joba quny - 300 mln dollar. Onda 150 myń tonnaǵa deıin maıly daqyldar óńdeledi.
