Qostanaıda áskerı qyzmetker klınıkalyq ólimnen aman qaldy
QOSTANAI. QazAqparat - Qostanaıda komandır orynbasarynyń buıryǵyn oryndaǵan áskerı bólimshe qyzmetkeri klınıkalyq ólimnen aman qaldy, dep habarlaıdy «QazAqparat» HAA tilshisi.
Búgin Qostanaı garnızonynyń áskerı soty QR Ulttyq gvardııasynyń 6697 áskerı bólimshesi komandıriniń orynbasary, maıor Esbolat Tólegenovke qatysty «Aýyr saldarlarǵa ákeletin basshy nemese jaýapty tulǵanyń qyzmetine salǵyrt qaraýy» baby boıynsha sot úkimin shyǵardy.
Anyqtalǵandaı, oqıǵa 2017 jyldyń tamyz aıynda bolǵan. Maıor Tólegenov avtomobıl vzvodynyń júrgizýshisi, serjant Nıkolaı Karpenkoǵa symy oqshaýlanbaǵan áýe elektr jelisiniń astyndaǵy shatyrǵa jóndeý jumystaryn júrgizýge buıryq bergen.
Serjant Karpenko berilgen buıryqty oryndaǵan, alaıda, toq soǵyp es- túsinen aırylǵan ol dene jaraqattaryn alǵan. Zardap shegýshi qalalyq aýrýhanaǵa jetkizilip, «Elektr jaraqaty. Klınıkalyq ólimnen keıingi kúıde (koma), betterin, sol jaq bilegin, arqasy men taban býyndaryn elektr kúıigi shalǵan» degen dıagnoz qoıyldy.
Osylaısha, serjanttyń densaýlyǵyna aýyr zııan keltirildi, qazirgi ýaqytta Karpenko kosmetıkalyq emdeý sharalaryn qajet etedi.
Aıta ketý kerek, sottalýshy maıor Tólegenov óz kinásin moıyndamaı, serjantqa mundaı buıryq bergenin joqqa shyǵardy.
Esbolat Tólegenov kámelettik jasqa tolmaǵan eki bala tárbıelep otyrǵanyna baılanysty eki jylǵa shartty túrde bas bostandyǵynan aıyryldy.
