Qostanaıda ártúrli ult ókilderiniń alkogolsiz sýsyndarynyń kórmesi ótti
QOSTANAI. QazAqparat -Qostanaılyqtar Qazaqstan halqynyń birligi kúnin atap ótti, dep habarlaıdy QazAqparat tilshisi.
Qostanaıdaǵy Birlik meıramy «Bir halyq - bir el» atty merekelik baǵdarlamamen bastaldy. Aıtýly datamen turǵyndardy quttyqtaýǵa oblys ákimi Arhımed Muhambetov te keldi.
«Qazaq jerine qonystanǵan ózge etnos ókilderi jergilikti halyqpen etene jaqyn aralasyp, bir atanyń balasyndaı bolyp ketti. Biz úshin dostyq, baýyrlastyq uǵymy tym baǵaly. Qoǵamdyq kelisim men ózara túsinistik elimizdiń órkendeýiniń negizi. Bizdiń elimiz osy birliktiń kúshimen túrli belesterdi baǵyndyryp keledi. Qostanaı oblysyn 90-nan astam ult pen ulys meken etedi. Búgingi meıram olardyń bárine ortaq. Túrli ult ókilderin qosqan shańyraǵymyz aman bolsyn!» - dedi óńir basshysy.
Munan soń Arhımed Muhambetov oblystaǵy Qazaqstan halqy Assambleıasyna 2,5 mln teńgeniń sertıfıkatyn tapsyrdy. Assambleıa múshesi Qalqaman Jaqyptyń sózinshe, bul qarjy jergilikti etnomádenı birlestikterdiń ofısterin jaraqtandyrýǵa jumsalmaq.
«Birlik pen tynyshtyq ornaǵan jerde bereke bolady. Egemendik alǵan jyldary, naryq ekonomıkasyna kósher kezde bizdiń el óziniń yntymaq-birligin aldyǵa qoıdy. Sol arqyly zamannyń túrli synaqtaryna qarsy turdy. Mine, birliktiń arqasynda jetken jetistikterimizdi álem bilip otyr. Mysaly, búgingi sharada túrli etnos ókilderi ózderiniń salt-dástúri men mádenıetin, ónerin pash etýde aıanyp qalǵan joq. Munyń ózi el ishindegi saıasattyń nyq ornaǵanyn bildiredi», - dedi Q.Jaqyp.
Oblys ákimi Sıtı-ortalyqtaǵy alkogolsiz sýsyndar kórmesine qatysty. Munda ár ult ózderiniń ulttyq sýsyndaryn kórsetti.
«Alkogolsiz sýsyndar jármeńkesin Birlik kúni merekesiniń jańashyldyǵy deýge keledi. Bul kórmeni ótkizýdegi maqsat halyqty ár ulttyń sýsyndarymen tanystyrý edi. Mysaly, ózbekterdiń ulttyq sýsyny kók sháı ekenin kóbi bile bermeıdi. Buǵan qosa, turǵyndarǵa kók sháıdiń shyǵý tarıhy men paıdasyn aıtamyz», - dedi ózbek mádenı birlestiginiń ókili Janna Tynymbaeva.
Oblystyq fılarmonııanyń ártisteri men shyǵarmashylyq ujymdary kontserttik baǵdarlamasymen meıram kórigin qyzdyra túsedi. Sondaı-aq, ortalyqqa jıylǵan jurtshylyq toǵyzqumalaq oıyny men sýretshiler baıqaýyn tamashalady.
