Qostanaıda arpa ornyna bıdaı ákelýdiń taǵy bir áreketi toqtatyldy

QOSTANAI. QazAqparat – Qazaqstan aýmaǵyna Reseı Federatsııasynan 30 tonna bıdaı jalǵan qujattarmen kirgizilmek bolǵan, dep habarlaıdy QazAqparat Qostanaı oblysy boıynsha Memlekettik kirister departamentiniń baspasóz qyzmetine silteme jasap.

Qostanaı oblysy boıynsha Memlekettik kirister departamenti Qostanaı oblysy boıynsha Shekara qyzmeti departamentimen birlesip, 26 sáýirde «Obaǵan» avtomobıl ótkizý beketinde Reseı Federatsııasynan bıdaı ákelýdiń kezekti áreketiniń jolyn kesti.

Bıdaıdy ákelýge tyıym salynǵanyna qaramastan, shekteýdi «aınalyp ótý» maqsatynda syrtqy ekonomıkalyq qyzmetke qatysýshylar taǵy da 30 tonna bıdaıdy basqa taýarmen jasyryp, jalǵan qujattarmen ótkizýge tyrysqan.

Esterińizge sala keteıik, 21 sáýirde «Qaıraq» ótkizý beketinde jalpy salmaǵy 60 tonnadan asatyn bıdaı ákelýdiń 2 áreketi toqtatylǵan bolatyn.

Qostanaı oblysy boıynsha Memlekettik kirister departamenti syrtqy ekonomıkalyq qyzmetke qatysýshylardy Qazaqstan Respýblıkasynyń qoldanystaǵy zańnamasyn saqtaýǵa shaqyrady.