Qostanaıda áreketke qabiletsiz áıeldi zańsyz bas bostandyǵynan aıyrǵan sheneýnikter sottaldy

QOSTANAI. QazAqparat - Oblystyq jumyspen qamtýdy úılestirý jáne áleýmettik baǵdarlamalar basqarmasynyń bólim basshysy, aýyldyq arnaýly áleýmettik qyzmet kórsetý ortalyqtarynyń biriniń dırektory, sondaı-aq jekemenshik ınternat úıiniń basshysy sot aldynda jaýap berdi. Olardyń barlyǵyna áreketke qabiletsiz áıeldi zańsyz bas bostandyǵynan aıyryp, jumys isteýge paıdalandy degen aıyp taǵyldy, dep habarlaıdy QazAqparat tilshisi Qostanaı oblystyq sotyna silteme jasap.

Qostanaı qalasynyń №2 sotynda Qostanaı oblysy ákimdiginiń jumyspen qamtýdy úılestirý jáne áleýmettik baǵdarlamalar basqarmasynyń basshysy Maıdashash Jumaǵalıǵa, Peshkovskıı arnaıy áleýmettik kómek kórsetý ortalyǵynyń dırektory Damıra Ábildınova men «Zabota» jekemenshik ınternat úıiniń meńgerýshisi Kamıla Bımendınaǵa qatysty qylmystiq is qaraldy.

Olardyń úsheýi de QR Qylmystyq kodeksiniń úsh baby boıynsha jaýapqa tartylǵan: 128-bap «Qyzmet babyn paıdalana otyryp, adamdy jumysqa tartý, tasymaldaý, berý», 126-bap «Zańsyz bas bostandyǵynan aıyrý», 362-bap «Bılik pen ókilettikti asyra paıdalaný».

«2021 jyldyń 8 jeltoqsany men 2022 jyldyń 5 sáýiri aralyǵynda Jumaǵalı, Ábildınova, Bımendına psıhıkasynyń buzylýynan zardap shegetin jábirlenýshi M.-nyń materıaldyq jáne ózge de táýeldiligin paıdalana otyryp, ony Qostanaı oblysy Fedorov aýdanynyń Peshkovka aýylynda ornalasqan «Peshkovskıı arnaýly áleýmettik qyzmetter kórsetý ortalyǵy» mekemesinen Astana qalasyndaǵy «Zabota» jekemenshik ınternat úıine zańsyz aparyp, tegin jumys kúshi retinde paıdalanǵan», - dep habarlady oblystyq sottan.

Budan basqa, Jumaǵalı 2022 jyldyń naýryz aıynda óziniń qyzmet babyn paıdalanyp jáne qyzmettik ókilettikterin asyra otyryp, «Lısakovskıı arnaýly áleýmettik qyzmetter kórsetý ortalyǵynyń» dırektory M.-nan eresekterge arnalǵan 60 pampersti zańsyz berýin talap etip jáne olardy alyp, sońǵysyna jalpy somasy 36 240 teńge zııan keltirgen.

Prokýror bas bostandyǵynan aıyrý túrindegi qylmystardyń jıyntyǵy boıynsha Jumaǵalıǵa – 12 jyl merzimge, Ábildınova men Bımendınaǵa – árqaısysyna 9 jyl bas bostandyǵynan aıyrý jazasyn taǵaıyndaýdy surady. Sottalýshylar qylmystyq quqyqbuzýshylyqtardy jasaýdaǵy kinálaryn tolyq moıyndaǵan joq.

«Sottalýshylardyń jeke basyn, istiń mán-jaıyn, jasalǵan qylmystardyń aýyrlyǵyn eskere otyryp, sot Qylmystyq kodekstiń 58-babynyń 3-bóligin negizge ala otyryp, Jumaǵalıdy 8 jylǵa bas bostandyǵynan aıyrý jazasyna kesti. Sottalýshy Ábildınova QK 55-babynyń 2,6-bóligin negizge ala otyryp, memlekettik qyzmette laýazymdardy atqarý quqyǵynan ómir boıyna aıyrý jáne 6 jyl 7 aıǵa bas bostandyǵynan aıyrý jazasy taǵaıyndaldy. Al Bımendınaǵa QK 55-babynyń 2,6-bóligin qoldanyp, 6 jyl merzimge bas bostandyǵynan aıyrý túrindegi úkim shyǵaryldy», - delingen sot otyrysynda.

Sondaı-aq sot QR Memlekettik qyzmet isteri agenttiginiń Qostanaı oblysy boıynsha departamentine Qostanaı oblysy ákimdiginiń jumyspen qamtýdy úılestirý jáne áleýmettik baǵdarlamalar basqarmasynyń laýazymdy tulǵalaryna shara qoldaný týraly jeke uıǵarym shyǵardy.

Úkim zańdy kúshine engen joq.