Qostanaıda aptap ystyqta aýyr júk kólikteriniń qozǵalysyna shekteý qoıylady
ASTANA. KAZINFORM — «QazAvtoJol» ulttyq kompanııasy Qostanaı oblysyndaǵy fılıalynyń málimetine sáıkes, jaz mezgilinde respýblıkalyq mańyzy bar joldarda aýyr júk kólikteriniń qozǵalysyna shekteý engiziledi.
Shekteý 2026 jyldyń 1 maýsymy men 15 tamyzy aralyǵynda aýa temperatýrasy 25 gradýstan asqan kezde kúshine enedi.
Erejege sáıkes, saǵat 11:00 men 21:00 aralyǵynda bir óske túsetin júkteme salmaǵy 8 tonnadan asatyn kólikterdiń qozǵalysyna tyıym salynady.
«QazAvtoJol» ókilderiniń aıtýynsha, bul shara asfalt jabynynyń búlinýine jol bermeý úshin qajet. Qazirdiń ózinde respýblıkalyq mańyzy bar trassalarda aýyr júk kólikterine qatysty ýaqytsha jol belgisi ornatylǵan.
Tasymaldaýshylar men júrgizýshilerden joldyń baǵytyn aldyn ala josparlap, erejeni buzbaý keregi eskertiledi.
Aıta keteıik, buǵan deıin aýyr júk kólikterin qalaǵa kirgizbeıtin ólsheý júıesi ázirlenip jatqanyn jazǵan edik.
Darııa Ǵumar
