Qostanaıda apellıatsııalyq sot kásipkerdiń 67 mln teńgeden astam aıyppulyn joıdy
QOSTANAI. KAZINFORM – Qostanaı oblystyq apellıatsııalyq soty 67 mıllıon teńgeden astam salyq aıyppulyn joıyp, jeke kásipkerdiń paıdasyna sheshim qabyldady, dep habarlaıdy Kazinform agenttigi Qostanaı oblystyq sotyna silteme jasap. Sot jeke kásipkerge qatysty salyqtyq tekserýdiń zańsyz júrgizilgenin anyqtap, ony jaramsyz dep tanydy.
Іstiń mán-jaıyna toqtalsaq, ýákiletti organ 2023 jyldyń qańtar–mamyr aılary aralyǵynda jeke kásipkerdiń tabysy qosylǵan qun salyǵy (QQS) boıynsha mindetti tirkeý úshin belgilengen shekti aınalym mólsherinen — aılyq eseptik kórsetkishtiń (AEK) 20 000 eselengen mólsherinen asyp ketkenin anyqtaǵan. Osyǵan baılanysty kásipker, tabys sheginen asqan aı aıaqtalǵannan keıingi 10 jumys kúni ishinde QQS boıynsha esepke qoıý týraly ótinish bermedi degen ýájben ákimshilik jaýapkershilikke tartylǵan.
Birinshi satydaǵy sot kásipkerdi ákimshilik quqyq buzýshylyq jasaǵany úshin kináli dep tanyp, 67 mln teńgeden astam aıyppul salǵan. Alaıda, apellıatsııalyq shaǵymdy qaraǵan Qostanaı oblystyq soty birinshi satydaǵy sottyń qorytyndysymen kelispegen.
Belgili bolǵandaı, istiń qozǵalýynyń negizi — QQS boıynsha tirkeýdiń bolmaýyna baılanysty júrgizilgen jospardan tys taqyryptyq salyqtyq tekserý aktisi bolǵan. Alaıda atalǵan tekserý taǵaıyndalǵan jáne bastalǵan sátte jeke kásipker QQS boıynsha esepke alynǵan bolyp shyqqan.
«Sol sebepti, kórsetilgen negiz boıynsha jospardan tys tekserý júrgizý zańsyz dep tanylyp, tekserý barysynda alynǵan materıaldar dálel retinde jaramsyz dep esepteldi. Tekserý kezinde Kásipkerlik jáne Salyq kodeksteriniń talaptary buzylǵany anyqtalyp, quqyq buzýshylyq quramynyń bolmaýyna baılanysty is júrgizý toqtatyldy», dep habarlady Qostanaı oblystyq soty.
Apellıatsııalyq satynyń qaýlysymen birinshi satydaǵy sottyń qaýlysy kúshin joıyp, ákimshilik is júrgizý toqtatyldy. Qaýly zańdy kúshine endi.
Buǵan deıin Qostanaı oblysynda sý qubyry qurylysyna arnalǵan 157 mln teńge memleket kirisine óndirilgenin jazdyq.