Qostanaıda apellıatsııalyq sot bankrot kásiporyn qyzmetkerlerinen 93 mln teńge óndirip alý sheshimin toqtatty
QOSTANAI. KAZINFORM – Qostanaı oblystyq soty aýyl sharýashylyǵy daqyldaryn ósirýmen aınalysqan JShS-niń bankrottyq rásimi aıasynda burynǵy qyzmetkerlerinen 93 mln teńgeden astam somany óndirip alý týraly sheshimdi zańsyz dep tapty.
Іs materıaldaryna sáıkes, bankrottyq basqarýshy 2021 jyly kásiporyn shotynan býhgalterlik qujattarmen rastalmaǵan qarajat alynǵanyn alǵa tartyp, úsh qyzmetkerden birlesip óndirip alý týraly talap qoıǵan.
Birinshi satydaǵy Qostanaı oblysynyń mamandandyrylǵan aýdanaralyq ekonomıkalyq soty talapty ishinara qanaǵattandyryp, býhgalterdiń kómekshisinen 87 mln teńgeden astam qarajatty óndirip alý týraly sheshim qabyldaǵan edi.
- Alaıda apellıatsııalyq saty – Qostanaı oblystyq soty isti qaıta qarap, basqa tujyrymǵa keldi. Sot býhgalterdiń kómekshisi shottan alynǵan 84 mln teńgeni sol kúni kásiporynnyń kassasyna qaıtarǵanyn rastaıtyn dálelder bar ekenin anyqtady. Bul derekter kassalyq kitaptaǵy jazbalarmen sáıkes keledi.
Sonymen qatar, bankrottyq basqarýshy kassalyq kitaptaǵy aqsha qarajatynyń túsý faktisin joqqa shyǵarmaǵan. Al bank kóshirmesinde kórsetilgen shamamen 3 mln teńgeniń is júzinde alynbaǵany dáleldendi, - delingen aqparatta.
Osyǵan baılanysty apellıatsııalyq satydaǵy sot birinshi satynyń sheshimin joıyp, talapty tolyǵymen qanaǵattandyrýdan bas tartty.
Sottyń qaýlysy zańdy kúshine endi.
Aıta keteıik, Qostanaı qalasynyń prokýrory taǵaıyndaldy.