Qostanaıda apatty sý qubyryn kúrdeli jóndeýge daıyndyq júrip jatyr

ASTANA. KAZINFORM — Qostanaı qalasyndaǵy sý qubyrlarynda apatty jaǵdaı boldy. Zaqymdaný joıylǵanymen, qubyr tehnıkalyq turǵydan apatty dep tanylyp, kúrdeli jóndeýdi qajet etedi, dep habarlaıdy Kazinform tilshisi.

Qala ákimdiginiń málimetinshe, L. Beda kóshesinde, Abaı dańǵyly men Altynsarın kóshesiniń aralyǵynda apat tirkelgen. Zaqym ýaqytsha jóndelgen, alaıda bul tek kúrdeli jóndeý jumystary bastalǵanǵa deıingi ýaqytsha sheshim.

Mamandardyń aıtýynsha, dıametri 500–600 mm bolatyn bolat qubyr apatty jaǵdaıda, tozý deńgeıi joǵary jáne keshendi aýystyrýdy qajet etedi. Kommýnaldyq qyzmetterdiń baǵalaýy boıynsha, mundaı tehnıkalyq kúrdeli jumys shamamen jeti táýlikke sozylýy múmkin.

Aldaǵy merekelik demalys kúnderi men jańa oqý jylynyń bastalýyna baılanysty kúrdeli jóndeý jumystarynyń bastalý merzimi keıinge shegerildi. Jóndeý jumystary 2 qyrkúıekte bastalady.

— Osy kúni L. Beda kóshesiniń Altynsarın kóshesinen Abaı dańǵylyna deıingi bóliginde avtokólik qozǵalysy ýaqytsha shekteledi. Qala turǵyndary men jol qozǵalysyna qatysýshylardan ýaqytsha qolaısyzdyqtarǵa túsinistikpen qarap, marshrýttaryn aldyn ala josparlaýlary suralady, — delingen habarlamada.

Budan buryn 29 tamyzda Qostanaıda apat saldarynan jaryq óshkeni belgili boldy.