Qostanaıda apaly-sińililerdi jezókshelikke májbúrlegen jeńgetaı ustaldy

QOSTANAI.QazAqparat – 10-14 qarasha kúnderi qostanaılyq polıtsııa qyzmetkerleri adam saýdasyna baılanysty qylmystardyń aldyn alýǵa, jolyn kesýge baǵyttalǵan «STOP-trafık» jedel is-sharasyn ótkizdi, dep habarlaıdy QazAqparat tilshisi oblystyq polıtsııa departamenti baspasóz qyzmetine silteme jasap.

Aktsııa barysynda oıyn-saýyq oryndary, monsha keshenderi, saýnalar, jalǵa berilgen páterler, qonaq úıler, sondaı-aq sharýa qojalyqtary men qurylys nysandary tekserildi.

«STOP-trafık» ótkizý qorytyndysy boıynsha Qostanaı oblysy PD krımınaldyq polıtsııa basqarmasynyń qyzmetkerleri adam saýdasy jáne jezókshelikpen aınalysýdyń birneshe faktisin anyqtady. «Progress katalızatory» jeke qorymen birlesip, adam saýdasynyń qurbany bolǵandardy arnaýly áleýmettik qyzmet kórsetý ortalyǵyna ornalastyrdy.

«Adamdy bas bostandyǵynan zańsyz aıyrý faktileriniń biri B.Maılın atyndaǵy aýdanda tirkelgen. Qaırankól aýylynyń mańyndaǵy sharýashylyqta 33 jastaǵy turǵyn 2018 jyldyń sáýir aıynan bastap 2020 jyldyń qyrkúıek aıyna deıin 21 jastaǵy jigitti jaıylymda úı malyn qaraý boıynsha jumys isteýge májbúrlegen. Atalǵan fakti boıynsha QR QK 126-baby 3-bóligi 2-tarmaǵymen qylmystyq is tirkeldi.

Sondaı-aq jedel aldyn alý is-sharasy barysynda tártip saqshylary oblys ortalyǵynda 2000 jáne 2001 jyly týǵan apaly-sińili qyzdardy jezókshelikpen aınalysýǵa májbúrlegen 28 jastaǵy áıeldi ustady. Atalǵan derek QR Qylmystyq kodeksiniń 308-baby 1-bóligi boıynsha qylmystyq is retinde tirkeldi», - deıdi oblystyq Polıtsııa departamenti baspasóz qyzmetindegiler.