Qostanaıda AÓK-ny damytý kartasy tanystyryldy

QOSTANAI. QazAqparat - Búgin QR Aýyl sharýashylyǵy birinshi vıtse-mınıstri Qaırat Aıtýǵanov Qostanaı oblysynyń aımaqtarymen beınekonferentsııa ótkizdi, dep habarlaıdy QazAqparat tilshisi.

Qaırat Aıtýǵanov qostanaılyqtardy ázirlenip jatqan Agroónerkásiptik  keshendi (AÓK) damytý kartasymen tanystyrdy.

«Búginde bizde 13 karta bar. Birinshi karta aýylsharýashylyq kooperatıvterin qamtıdy. Ol bir jyldan artyq jumys istep keledi. Aıta keterligi, ol memlekettik baǵdarlama retinde maquldandy, qazirde jaqsy júzege asyrylýda», - dedi Aıtýǵanov.  

Olardyń arasyndaǵy Agroóńdeý kartasyn Úkimet qabyldady. Al qalǵan kartalar búgin tanystyryldy.

«Olar - tehnıkalyq qaıta jaraqtandyrý, tuqym jáne agrohımııa kartalary. Egistik kólemin ulǵaıtý, jaıylymdyq mal sharýashylyǵy, agroǵylymdy jańǵyrtý, sıyr etin óndirý Kartalary áli ázirlený satysynda»,  - dedi ol.

Jıynda aýylsharýashylyq kooperatıvteri týraly sóz etildi. 1 qazanǵa deıingi málimet boıynsha, Qazaqstanda 745 kooperatıv qurylǵan. Onyń 273-i sút daıyndaý jáne 358-i et óndirý kooperatıvi. 56 myń jeke qosalqy sharýashylyq qamtylǵan.

«Óz-ózin eńbekpen qamtyǵandar jáne jumyssyzdar óz kúshterimen 6 myńǵa jýyq mal bordaqylaý alańdaryn qurdy. Búgingi kúni 64 sútóndirý zaýytyna 44 tonna sút daıyndaldy, zaýyttardyń júktemesi 25 paıyzǵa artty.  Bul óte jaqsy kórsetkish. Bul máselede Qostanaı oblysy kósh ilgeri», - dep atap ótti Aıtýǵanov.

Aıtýǵanovtyń sózinshe, respýblıkalyq Kartamen qatar, ár óńir ózderiniń damý kartalaryn jasaýy kerek.