Qostanaıda «Antares Limited» qarjy pıramıdasy anyqtaldy

NUR-SULTAN. QazAqparat – Qarjy pıramıdasynyń uıymdastyrýshylary kompanııaǵa 100 AQSh dollaryn salyp, kún saıyn kepildi tabysqa kenelýdi ýáde etken, dep habarlaıdy QazAqparat Qarjylyq monıtorıng agenttigine silteme jasap.

Atap aıtqanda, kompanııaǵa 100 AQSh dollaryn qolma-qol salǵan adam kúnine ınvestıtsııasynan 0,5-2% tabys tabatyny ýáde etilgen.

Qazir pıramıda uıymdastyrýshylaryna qatysty tergeý jumystary bastaldy. Kúdiktiler úı qamaqta.

Agenttik taǵy da azamattardy óte saq bolýǵa, qarjy pıramıdalaryna tartatyn alaıaqtardyń aldaýyna túsip qalmaýǵa shaqyrady.

«Qarjy pıramıdalarynyń basty maqsaty – kapıtaldy jyldam ári ońaı jolmen eselep alýdy usynyp, sengish adamdardyń esebinen paıda tabý ekenin bilý kerek»

delingen Agenttik habarlamasynda.

Eske sala keteıik, QR Parlamenti Májilisiniń tóraǵasy Erlan Qoshanov qarjy pıramıdalarynyń alaıaqtyq áreketterin bile turyp jarnamalaǵan adamdardy qylmystyq jaýapqa tartatyn zań birinshi jarty jyldyqta qabyldanýy múmkin ekendigin aıtqan.