Qostanaıda ańshylyq týrızmdi damytý úshin 300 ga alqap bólinedi
QOSTANAI. QazAqparat - 2018 jyly Qostanaı oblysynda memlekettik-jekemenshik áriptestikti damytý sheńberinde ańshylyq jáne trofeılik týrızmdi iske asyrý qolǵa alynady, dep habarlaıdy QazAqparat tilshisi.
Óńirde qandaı týrıstik jobalar iske asyrylady? Olardy iske asyrý úshin qansha jer telimi bólingen? Osy suraqtar boıynsha oblystyq kásipkerlik jáne ındýstrııalyq-ınnovatsııalyq damý basqarmasy basshysynyń orynbasary Roza Gorıannaıa jaýap berdi.
Basqarma málimetine súıensek, ótken jyldarmen salystyrǵanda 2017 jyldyń birinshi jarty jyldyǵynda týrızm salasyndaǵy negizgi kórsetkishterdiń ósý úrdisi baıqaldy. Oblysta saýyqtyrý týrızmi belsendi damyp keledi. Negizgi týrıstik baǵyt - Altynsarın aýdany. Munda shıpajaılar, demalys oryndary men saýyqtyrý lagerleri bar.
«Joba boıynsha Qostanaı oblysynda týrıstik ań aýlaý aımaǵyn jasaý úshin jáne «Qyzyl kitapqa» engen janýarlardy aıryqsha qorǵaýǵa 300 ga alqap bólinetin bolady», - dedi Roza Gorıannaıa.
Qazaqstannyń Úshinshi jańǵyrýynyń basym baǵyttarynyń biri týrızmdi damytý desek, bul sala boıynsha oblysta ekotýrızm men emdeý-saýyqtyrý keshenderi ozyq tur.
Eske salsaq, bıyl QR Mádenıet jáne sport vıtse-mınıstri A.Batalov Qostanaı oblysy tóńiregindegi geoglıfterdi paıdalana otyryp, týrıstik aımaq qurýdy usynǵan. Vıtse-mınıstr memlekettik-jekemenshik áriptestik salasynda da kóptegen jobany birlese otyryp, qolǵa alýǵa bolatynyn aıtty. Onyń pikirinshe, Qazaqstanda ańshylyq-trofeılik týrızm damymaı jatyr.
«Biz áleýmettik týrızmdi damytý joldaryn da qarastyramyz. Bul rette óńirdegi 103 ań sharýashylyǵy uıymy bizge kómektesedi. Qazirdiń ózinde «Spetsnaz» saýyqtyrý demalys bazasy joǵarǵy qarqynda jumys istep tur. Jalpy, jyl aıaǵyna deıin týrızm salasynda 7 joba júzege asady»,- dep málimdedi Gorıannaıa.
Aıta ketý kerek, barlyq jobaǵa 512 mln teńge qarajat jumsalady. Sondaı-aq, 70 jańa jumys orny ashylady dep kútilýde.
