Qostanaıda ańshylyq dúkenindegi órtten 4 adam qaza tapqan – Bas prokýratýra
NUR-SULTAN. QazAqparat – QR Bas prokýratýrasy Qostanaı qalasyndaǵy «Orýjeınaıa palata» ańshylyq dúkenindegi órttiń zardaby týraly málimet taratty, dep habarlaıdy QazAqparat tilshisi.
«3 qyrkúıekte Qostanaı qalasynda «Orýjeınaıa palata» ańshylyq dúkeni órtengen. Sonyń saldarynan dúkenniń jeti qyzmetkeri zardap shegip, úsheýi kúıik shalyp aýrýhanaǵa jatqyzyldy, al tórteýi qaza tapty», - dep jazylǵan vedomstvonyń baspasóz qyzmeti taratqan resmı aqparatta.
Eske salsaq, buǵan deıin Tótenshe jaǵdaılar mınıstrligi atalǵan órtten 2adamnyń qaıtys bolǵanyn habarlaǵan edi.
Bas prokýratýra Qostanaı oblysyndaǵy órtterge baılanysty 3 qylmystyq is qozǵady.
Atalǵan faktiler boıynsha Qylmystyq kodekstiń 204-babynyń 2-bóligi (otpen abaısyz jumys isteý arqyly aýyr zardaptarǵa ákep soqqan nemese asa iri zalal keltirilgen is-áreket), 341-babynyń 1-bóligi (ormandardy joıý), 292-babynyń 3-bóligi (abaısyzda eki nemese odan da kóp adamnyń ólimine ákep soqqan órt qaýipsizdigi talaptaryn buzý) boıynsha sotqa deıingi tergep-tekserý áreketteri bastaldy.
