Qostanaıda analar keńesi órtten zardap shekkenderge úı satyp alý úshin aqsha jınap berdi
QOSTANAI. QazAqparat - Qazaqstan halqy Assambleıasynyń Qostanaı oblystyq analar keńesi órtten zardap shekken kóp balaly otbasyǵa úı satyp alý úshin aqsha jınaýǵa kómektesti.
Polovnıkovka aýylyndaǵy (Qostanaı aýdany) oralman Bazarovtar otbasynyń úıindegi órt 30 qazanda boldy. Elektr jelisiniń saldarynan bolǵan órt balshyq úıdi túgelimen jaıpaǵan. Órt bolǵan ýaqytta Bazarovtar úıde bolmaǵandyqtan, otbasy músheleri zardap shekpegen. Bazarovtar otbasyndaǵy qıyn jaǵdaı týraly pedagogıkalyq birlestik bildi (otaǵasy Erbol mektepte matematıka pániniń muǵalimi). Qostanaı memlekettik ýnıversıtetiniń qyzmetkeri Shýshanık Sarkısıan órt qurbandaryna kómek qolyn sozý úshin qarjy jınaýdy uıymdastyrady. Sarkısıan - QHA Qostanaı analar keńesiniń tóraǵasy.
«Órtten keıin Polovnıkovkaǵa alǵash ret biz jettik, - dep aıtady Shýshanık Sarkısıan. - Biz azyq-túlik, zattar, kıimder alyp keldik. Bazarovtardyń basyndaǵy qaıǵyly jaǵdaıdy kórip, kómektesýdi jón kórdik. Bul jerde eshqandaı týystary joq, atalmysh otbasy Ózbekstannan tarıhı otandary Qazaqstanǵa úsh jyl buryn kóship kelgen».
Shýshanık Sarkısıannyń aıtýynsha, ol «qajetti qarjyny óte az ýaqytta jınaımyn dep oılamaǵan». Qostanaı analar keńesiniń ótinishine alǵashqy bolyp QMÝ rektory Hýsaın Valıev pen ýnıversıtettiń pedagogıkalyq quramy úı alýǵa aqshalaı kómektesetindikterin jetkizgen. JOO ujymy arnaıy shotqa bir kúndik jalaqylaryn aýdardy. Stýdentter keńesi de óz úlesterin qosty. Barlyǵy 1,5 mln teńge jınaldy. Bul qarjy Polovnıkovkadan úı alyp, ishin jıhazben jabdyqtaýǵa da jetkilikti bolǵan. Qostanaı oblystyq dostastyq úıi men Analar keńesiniń ókilderi balalardyń bilim alýyna qajetti oqý quraldardy, jańajyldyq syılyqtardy, jemis-jıdekter men úlken tort alyp keldi.
