Qostanaıda alkogolmen baılanysty qylmystar sany artty
QOSTANAI. KAZINFORM - Qostanaıda alkogoldik ishimdikterdi tutynýǵa baılanysty qylmystar sany kóbeıip otyr. 2025 jyldyń alǵashqy bes aıynda mundaı qylmystar sany ótken jyldyń sáıkes kezeńimen salystyrǵanda 20,7%-ǵa artqan.
Osyǵan baılanysty jergilikti polıtsııa qyzmetkerleri eriktilermen birlesip túngi reıd júrgizdi. Maqsat — 21 jasqa tolmaǵan azamattarǵa alkogol men temeki ónimderin zańsyz satý áreketterin anyqtaý.
Áleýmettik eksperıment barysynda 19 jáne 20 jastaǵy eriktiler dúkenderde zańnyń saqtalýyn tekserdi. Kóptegen saýda oryndarynda satýshylar zań talabyn oryndaǵan. Alaıda qalanyń ońtústik bóliginde ornalasqan bir dúkende olarǵa syra men temeki satylǵan. Atalǵan quqyq buzýshylyq boıynsha ákimshilik jaýapqa tartý úshin materıaldar rásimdeldi.
Jergilikti polıtsııa qyzmeti basqarmasynyń aǵa ınspektory Indıra Nurıevanyń málimetinshe, jyl basynan beri 125 reıd júrgizilip, 18 dúken ıesi kámeletke tolmaǵandarǵa alkogol satqan úshin jaýapqa tartylǵan. Taǵy bir satýshy 21 jasqa tolmaǵan adamǵa temeki ónimin satqan úshin jaýapqa tartyldy.
Osyǵan deıin Qostanaıdaǵy arnaıy ortalyqta 16 jastaǵy qyzdyń útikpen kúıdirilgeni týraly jazdyq.