Qostanaıda alıment tóleýden qashqandardyń sýreti kóshelerge ilinbek
Qazirgi kúni Qostanaı qalasynyń jeke sot oryndaýshylarynyń qolynda 6 myńnan artyq is bar. Olardyń kóbi – alıment tóleýden qashqandar. 1200 boryshker 2725 balaǵa tıesili qarjyny tólemeı keledi. Eskertý qaǵazyn alǵan 300 áke qaryz ekenin bile tura eshqandaı amal qoldanbaı otyr.
«Alıment tóleı almaıtyndardyń deni – turaqty jumysy joq adamdar. Mıllıondaǵan qaryzy bola tura eńbek etýden qashatyndar bar. Mundaı jaǵdaıda izdenýshi taraptyń aryzymen qylmystyq is qozǵalýy múmkin. Taıaýda qaryzynan qashqan 5 azamattyń isi sotta qaraldy. Taǵy 28 ákege qatysty ákimshilik is qozǵaldy», - deıdi Qostanaı qalasy prokýratýrasynyń aǵa prokýrory Gúlsim Imanbaeva.
Jumyssyz otyrǵandar da alıment tóleıdi. Olardyń aılyq tólemi qalaı esepteletinin mamandar túsindirip ótti. Eger boryshker jumys istemese, oǵan Qazaqstandaǵy ortasha eńbekaqy boıynsha esepteledi. Qazir ortasha aılyq kólemi 180 myń teńge shamasynda. Boryshkerdiń bir balasy bolsa, aıyna osy somanyń tórtten birin aýdaryp otyrýy kerek.
Jyl basynan beri óndirilgen soma 37 mln teńgeden asady. Odan bólek, sot oryndaýshylarynyń kómegimen alıment tóleı almaǵandardyń 2 avtokóligi satylyp, qaryzdary ótelse, sonymen birge, 1 úı bereshegin jabýǵa berilgen. Búginde 2 páter dál osyndaı maqsatpen izdenýshi jaqtyń menshigine ótpek.
Prokýrorlar bul baǵyttaǵy jumystar jetiletinin jetkizdi. Endi alıment tóleýden qashyp júrgenderdiń sýreti kóshelerge ilinbek. Zańnan eshkim jaltara almaıdy.