Qostanaıda áleýmettik mańyzy bar ónimderdiń baǵasy qymbattady

QOSTANAI. KAZINFORM – Dúkender men sýpermarketter monıtorıngi áleýmettik mańyzy bar ónimderdi satý salasyndaǵy buzýshylyqtardy anyqtady. Kásipkerler 313 myń teńge kóleminde aıyppul tóledi.

Qala boıynsha barlyǵy 1523 saýda nysany jumys isteıdi. Onyń ishinde 53 sýpermarket, 55 shaǵyn market, 1415 úı janyndaǵy dúkender.

Qalalyq kásipkerlik bóliminiń habarlaýynsha, saýda núkteleriniń ıelerimen áleýmettik mańyzy bar ónimder baǵasyn 15 paıyzdyq saýda ústemesinen asyrmaý týraly aqparattyq-túsindirý jumystary únemi júrgizilip turady.

Mundaı taýarlardyń jaǵdaıyna kelsek, jalpy qala boıynsha 350 áleýmettik sóre bar.

Baǵalardy qadaǵalaıtyn arnaıy top quramynda saýda jáne tutynýshylar quqyǵyn qorǵaý departamenti, tehnıkalyq retteý jáne metrologııa departamenti, aýyl sharýashylyǵy basqarmasy, kásipkerlik bólimi, «Tobyl» ÁKK» AQ, «AMANAT» partııasynyń oblystyq fılıaly ókilderi bar.

Top ár aıdyń basynda bir ret tekserý júrgizedi.

- Ótken aptada baǵa monıtorıngi aıasynda úı janyndaǵy 30 dúken tekserildi. 19 tekseris qazirgi ýaqytta quqyqtyq statıstıka organynyń tirkeýinde, - dep naqtylady kásipkerlik bóliminde.

Tekserýler azamattardyń shaǵymdary boıynsha da júzege asyrylady.

Máselen, jyl basynan beri áleýmettik mańyzy bar taýarlarǵa baǵa belgileý tizbegi boıynsha deldaldyq shemalardy tergeý jónindegi komıssııa 30 otyrys ótkizdi.

Taýyq eti, jumyrtqa, nan jáne un baǵasyn kóterýdiń deldaldyq shemalarynyń 7 faktisi anyqtalyp, komıssııaǵa usynyldy.

Áleýmettik mańyzdy taýarlar baǵasyn belgileý tetigin iske asyrýǵa 5,6 mlrd teńge, onyń ishinde turaqtandyrý qorynyń qyzmetine - 3,1 mlrd teńge bólindi.